امریکی پاپ سنگر مائیکل جیکسن کا دستانہ جس پر نقلی ہیرے جڑے ہوئے تھے اور جو انھیں پہلی مرتبہ ’مون واک‘ پیش کیئے جانے پر ملا تھا پینتیس لاکھ ڈالر میں نیلام ہو گیا ہے۔

مائیکل جیکسن کا یہ دستانہ ان ستر اشیاء میں شامل تھا جو نیویارک میں نیلام کیئے گئے ہیں۔ یہ دستانہ توقعات سے نو گنا زیادہ قیمت پر نیلام ہوا ہے۔

جیکسن کی ایک جیکٹ جو انہوں نے انیس سو نواسی میں اپنے ایک دورے کے دوران پہنی تھی سوا دو لاکھ ڈالر میں نیلام ہوئی اور ایک ہیٹ بائیس ہزار ڈالر میں بکا۔

نیو یارک میں ہونے والی اس نیلامی میں ہزاروں کی تعداد میں جیکسن کے مداحوں نے شرکت کی۔

نیلامی کرنے والے ڈیرن جولین نے کہا ہے کہ انیس سو تراسی میں جیکسن نے سفید ہیروں والا دستانہ پہن کی مون واک پیش کیا تھا وہ ایک تاریخی پرفارمنس تھی۔

انھوں نے کہا کہ نیلامی ان کی توقعات سے کہیں زیادہ کامیاب رہی۔

انھوں نے کہا کہ مائیکل جیکسن کی یادگار اشیاء کی نیلامی ایلوس پریسلے اور مارلن منرو کی اشیاء کی نیلامی سے کہیں زیادہ کامیاب رہی۔

انہوں نے کہا کہ جیکسن ایک غیر معمولی فنکار تھے اور نیلامی کی کامیابی ان کو خراج تحسین پیش کرنے کے مترادف ہے۔

جیکسن کا یہ دستانہ ہانگ کانگ سے تعلق رکھنے والے ایک بزنس مین ہوفمین ما چین کے شہر مکاؤ میں ایک ہوٹل کے لیے خریدا ہے جہاں اسی کو نمائش کے لیے پیش کیا جائے گا۔

ٹیکس اور تمام اخراجات کے بعد اس نیلامی سے چار لاکھ بیس ہزار ڈالر کی آمدنی ہوئی۔

مائیکل جیکسن پچاس سال کی عمر میں لاس اینجلس میں ایک دواء زیادہ مقدار میں لینے کی وجہ سے انتقال کرگئے تھے۔

بشکریہ بی بی سی اردو