کراچی (اسٹاف رپورٹر) وزیر داخلہ سندھ بریگیڈیئر (ر) اختر ضامن نے صوبے کے تمام ڈی سی اوز کو ہدایت کی ہے کہ 27سے 29دسمبر کے درمیان صوبہ سندھ میں شرپسند عناصر کی جانب سے جلاؤ، گھیراؤ، توڑ پھوڑ اور ہنگاموں کے نتیجے میں ہلاک شدگان اور زخمیوں نیز 14جنوری 2008ء کو لانڈھی میں گل احمد چورنگی کے قریب بم دھماکے میں ہلاک اور زخمی ہونے والے افراد کی فہرستیں جلد از جلد تیار کر کے محکمہ داخلہ سندھ کو بھجوائی جائیں تاکہ متاثرین اور ان کے لواحقین کو معاوضے کی فوری اور جلد از جلد ادائیگی کو یقینی بنایا جا سکے۔ ایک بیان میں انہوں نے کہا کہ مذکورہ واقعات میں ہلاک شدگان کے لواحقین کو 3لاکھ روپے فی کس جبکہ زخمیوں کو 50ہزار روپے فی کس کے حساب سے معاوضہ ادا کیا جائیگا۔ پاکستان رنیجرز (سندھ) کے ہیڈ کوارٹر میں ایک اعلیٰ سطح کا اجلاس ہوا جس میں شہر میں امن و امان کا جائزہ لیا گیا۔ رینجرز کے اعلامیہ کے مطابق اجلاس کی صدارت ڈی جی رینجرز سندھ میجر جنرل لیاقت علی نے کی جس میں پولیس اور حساس اداروں کے اعلیٰ افسران نے بھی شرکت کی۔ اجلاس میں قائد آباد بم دھماکے کے بعد شہر کی مجموعی سیکورٹی کا مفصل جائزہ لیا گیا جبکہ محرم الحرام کے حوالے سے قانون نافذ کرنے والے اداروں کی حکمت عملی کو حتمی شکل دی گئی۔ ڈی جی رینجرز نے محرم الحرام کے حوالے سے شہر کو 3 سیکورٹی زونز میں تقسیم کیا گیا ہے جس میں رینجرز کو تین کورز میں تقسیم کر دیا گیا ہے جو شاہ غازی رینجرز، بھٹائی رینجرز اور سچل رینجرز پر مشتمل ہیں۔ اس کے ساتھ ساتھ پولیس کے تینوں سیکورٹی زون کے افسران کو سیکورٹی پلان کا حصہ بنایا گیا ہے جو رینجرز کی کمان میں شہر میں امن و امان کے لئے جامع حکمت عملی ترتیب دیں گے۔