حامدکرزئی کی طالبان کوپکڑنے کیلئے افغان فورسزپاکستان بھیجنے کی دھمکی کابل. . . . افغانستان کے صدرحامدکرزئی نے طالبان رہ نماؤں کی گرفتاری کے لیے افغان فورسزپاکستان بھیجنے کی دھمکی دے دی ہے۔کابل میں نیوز کانفرنس سے خطاب کرتے ہوئے افغان صدر کا کہنا تھا کہ افغان فورسز کو اپنا دفاع کرنے کا مکمل حق حاصل ہے اور اگر سرحد پار سے دہشت گرد افغانستان میں داخل ہو کر یہاں کے لوگوں کو نشانہ بنارہے ہوں تو ایسی صورت میں افغان فورسز کو بھی منہ توڑ جواب دینا ہوگا۔حامد کرزئی نے پریس کانفرنس میں بیت اللہ محسود کو براہ راست مخاطب کرتے ہوئے کہا کہ افغان فورسز پاکستان میں انہیں ڈھونڈنکالیں گی اور ان کے گھر میں گھس کر انہیں ختم کردیا جائے گا۔افغان صدر نے کہا کہ ملا عمر بھی مقامی فورسز سے زیادہ دیر محفوظ نہیں رہ سکتا۔واضح رہے کہ افغان صدرحامد کرزئی کی جانب سے سرحد پارکارروائی کا یہ پہلا بیان ہے جبکہ اس سے قبل وہ بین الاقوامی برادری سے اس قسم کی کارروائیوں کی اپیل کرتے رہے ہیں۔

__________________