فلسطین میں حماس اور فتح میں نگران حکومت کے قیام اور نئے انتخاب کے لیے ایک عبوری معاہدہ طے پا گیا ہے جبکہ اسرائیل نے اس معاہدے کو رد کر دیا ہے ۔

فلسطینی حکام کے مطابق مصری حمایت سے طے پانے والے اس معاہدے کے تحت ایک نگران حکومت قائم ہوگی اور نئے انتخاب کی تاریخ کا اعلان کیا جائے گا۔

حماس اور فتح گزشتہ چار سالوں سے علیحدہ ہیں۔ حماس غزہ میں اور فتح غرب اردن میں حکمران ہے۔حماس اور فتح کی راہیں اس وقت جدا ہوگئی تھیں جب حماس نے 2007 میں زبردستی غزہ کا انتظام سنبھال لیا تھا۔

رواں ماہ میں غزہ میں ہزاروں لوگوں نے دونوں گروپوں میں صلح کے حق میں مظاہرہ کیا تھا۔

فلسطینی اور مصری ترجمانوں نے قاہرہ میں صحافیوں کو معاہدے کے بارے میں آگاہ کیا لیکن مزید تفصیلات جاری نہیں کیں۔ اس موقع پر حماس کے رہنما موسٰی ابومرزوق نے کہا کہ ’ہمارے اختلافات نے قابضین کو موقع دیا لیکن آج ہم تاریخ کا نیا باب لکھ رہے ہیں‘۔

فتح کے وفد کے سربراہ عظام الاحمد نے کہا کہ ’ہمیں فخر ہے کہ ہم میں باہمی اختلافات کے خاتمے کے لیے قومی سوچ موجود ہے اور یونہی ہم فلسطین کو آزاد کروا سکتے ہیں‘۔ اسرائیلی وزیراعظم کی معاہدے پر تنقید کے جواب میں ان کا کہنا تھا کہ ’محمود عباس نے کہہ دیا ہے کہ ہمیں حماس چاہیے اور حماس فلسطین کے قومی دھارے کا حصہ ہے‘۔

خیال رہے کہ اسرائیلی وزیراعظم بن یامن نیتن یاہو نے خبردار کیا ہے کہ فلسطینی حکام کو اسرائیل یا پھر حماس کسی ایک کے ساتھ امن معاہدہ کرنا ہو گا۔ ان کا کہنا تھا کہ ’مجھے امید ہے کہ فلسطینی اتھارٹی صحیح فیصلہ کرے گی جو کہ اسرائیل کے ساتھ امن کا قیام ہے‘۔

قاہرہ میں بی بی سی کے نامہ نگار جوناتھن ہیڈ نے کہا ہے کہ اگر یہ معاہدہ قائم رہتا ہے تو دونوں فلسطینی گروپوں میں پانچ سال کی چپقلش ختم ہو جائے گی جو آزاد فلسطینی ریاست کے قیام میں ایک رکاوٹ بن چکی ہے۔ تاہم حماس اور فتح نے اب بھی طے کرنا ہے کہ غزہ میں سکیورٹی کا نظام کس کے حوالے ہوگا اور غزہ اور غرب اردن کا انتظام کیسے چلے گا۔

بی بی سی اردو

__________________

میرا بلاگ۔ صدائےقلندرhttp://saifikhan011.blogspot.com/