حکمرانوں کا یوم حساب آچکا،روٹی سے محروم کروڑوں پاکستانی جلوس نکالیں گے،نواز شریف
لاہور (نمائندہ جنگ ) پاکستان مسلم لیگ (ن) کے قائد اور سابق وزیراعظم نواز شریف نے کہا ہے کہ حکمراں ٹولہ انتخابات کے نام پر دھاندلی، دھونس اور ضمیر کی خرید و فروخت کو رواج دے رہا ہے، جس سے وفاقِ پاکستان اور قومی عزت و وقار کو دھچکے لگ رہے ہیں۔ آج ادارے تباہ ہو چکے ہیں۔ کرپشن زوروں پر ہے۔ زراعت تباہی سے دوچار ہے اور لوگوں کو کھانے کے لیے آٹا نہیں مل رہا، بجلی کی لوڈ شیڈنگ سولہ گھنٹے روزانہ تک پہنچ چکی ہے۔ کارخانے بند ہو چکے ہیں اور حکومت کے اپنے لوگوں کے مطابق یہ صورتحال آنے والے مہینوں میں مزید تشویشناک ہو جائے گی۔ انہوں نے کہا کہ قرضوں کا کشکول توڑنے کا دعویٰ کرنے والوں نے اسٹیٹ بینک کی رپورٹ کے مطابق محض تین مہینے میں اندرونی ذرائع سے 191 ارب روپے کے اضافی قرضے لیے ہیں، ادھر غیر ملکی قرضے 42 ارب ڈالر سے بڑھ چکے ہیں۔ اس تشویشناک صورتحال کے باوجود حکمران ٹولہ کاغذی بیانات میں اپنی کارکردگی کی بنیاد پر عوام سے ووٹ حاصل کرنے کی بات کر رہا ہے۔ حقیقت یہ ہے کہ ان لوگوں نے عوام کی جیبیں خالی اور انہیں روٹی سے محروم کرکے اپنی تجوریاں اور اپنے پیٹ بھرے ہیں۔ حکمران ٹولے کا یوم حساب قریب آ چکا ہے کیونکہ عنقریب روٹی سے محروم اور بیروزگار کروڑوں پاکستانیوں کے شہر شہر اور قریے قریے میں جلوس نکلیں گے جو ان حکمرانوں سے حساب لیں گے۔ سابق وزیراعظم نے کہا کہ اب بھی وقت ہے کہ یہ لوگ قوم سے معافی مانگیں لوٹ کا مال واپس کریں ۔ اتفاق رائے سے عبوری حکومت اور الیکشن کمیشن قائم کریں جو صحافی برادری اور وکلاء برادری کی پیشہ ورانہ تنظیموں جیسے منصفانہ، آزادانہ اور شفاف انتخابات منعقد کروا کر اقتدار حقیقی منتخب نمائندوں کے حوالے کرے تاکہ وہ خدا کے فضل و کرم اور عوام کے تعاون سے ملک کو موجودہ تشویشناک صورتحال سے نکالنے کی کوشش کریں۔

__________________