اسلام آباد (نمائندہ جنگ) پاکستان مسلم لیگ نے حکمران اتحاد میں شامل جماعتوں کے ساتھ انتخابی مہم چلانے کیلئے تیاریاں مکمل کرلی ہیں۔ وزیراعظم شوکت عزیز  مسلم لیگ کے صدر چوہدری شجاعت حسین  وزیراعلیٰ پنجاب چوہدری پرویز الٰہی  سردار فاروق احمد خان لغاری  حامد ناصر چٹھہ  مخدوم فیصل صالح حیات  ایم کیو ایم کے پارلیمانی لیڈر ڈاکٹر فاروق ستار  وزیراعلیٰ سندھ ڈاکٹر ارباب رحیم وزیراعلیٰ بلوچستان جام یوسف اور انجینئر امیر مقام پر مشتمل ایک ٹیم انتخابی مہم کی نگرانی کرے گی۔ ذرائع نے بتایا ہے کہ مسلم لیگ کی سب سے بڑی انتخابی مہم پنجاب میں چوہدری پرویز الٰہی کی سربراہی میں چلائی جائے گی۔ جس کیلئے وسیع انتظامات کئے جا رہے ہیں۔ مسلم لیگ اور اتحادی جماعتوں کی طرف سے ملک کے بڑے شہروں میں جلسے منعقد ہوں گے جس میں حکمران اتحاد میں شامل جماعتوں کے رہنما خطاب کریں گے۔ اسلام آباد اور چاروں صوبوں میں مسلم لیگ کے انتخابی سیل بھی منظم کئے جا رہے ہیں۔ مسلم لیگ اگلے انتخابات میں تعلیم  روزگار اور انصاف سب کیلئے کے نعرے کو اپنے منشور کی بنیاد بنائے گی۔

__________________