کراچی (اسٹاف رپورٹر) پاکستان پیپلز پارٹی کراچی کے صدر راشد ربانی، جنرل سیکریٹری رفیق انجینئر، سیکریٹری اطلاعات سعید غنی، ضلعی صدور مرزا مقبول، راجہ رزاق، آفاق شاہد، فرید انصاری اور قاسم بلوچ نے کہا ہے کہ محترمہ بینظیر بھٹو کی شہادت کے بعد حکمراں بجائے سانحہ لیاقت باغ کے قاتلوں کو گرفتار کرنے اور پی پی پی کے غمزدہ کارکنوں کے زخموں پر مرہم رکھنے کے حالات کو مزید خراب کرنے کی بھرپور کوششوں میں مصروف ہیں۔ نہتے پارٹی کارکنوں پر فائرنگ کرکے 24 کو شہید اور 70 سے زائد کو زخمی کردیا جو مختلف اسپتالوں میں زیر علاج ہیں اور حکومت کارکنوں کے قتل میں ملوث اہلکاروں کے خلاف کارروائی کرنے کے بجائے ہزاروں پارٹی عہدیداروں اور کارکنوں کے خلاف دہشت گردی کے جھوٹے اور بے بنیاد مقدمات درج کرکے 900 سے زائد بے گناہ کارکنوں کو گرفتار کرلیا ہے۔ تمام گرفتار شدگان کو 30,29 اور 31 دسمبر کو ان کے گھروں سے گرفتار کیا گیا ہے۔ پی پی پی رہنماوٴں نے سوال کیا کہ محترمہ کی شہادت کے بعد قانون نافذ کرنے والے اداروں کے اہلکار کس کے حکم پر سڑکوں سے غائب ہوگئے اور شہر میں ڈاکووٴں اور رہزنوں کو کارروائی کی آزادی مل گئی ۔ انہوں نے کہا کہ کوئی پارٹی کارکن محترمہ کی شہادت جیسے عظیم سانحے کے بعد لوٹ مار میں ملوث نہیں ہوسکتا۔ انہوں نے مطالبہ کیا ہے کہ حکومت فوری طور پر کراچی میں 24 کارکنوں کو شہید اور 70 کو زخمی کرنے والے اہلکاروں کے خلاف مقدمات درج کرے۔ پارٹی کارکنوں اور عہدیداروں کے خلاف دہشت گردی کے مقدمات فوراً واپس لے۔