وفاقی وزیر پارلیمانی امور ڈاکٹر شیر افگن نیازی نے ایمرجنسی کے نفاذ کو درست اقدام قرار دیتے ہوئے کہا ہے کہ سپریم کورٹ سپریم گورنمنٹ بن گئی تھی اور اس کا کوئی بھی اقدام درست نہیں تھا، اتوار کے روز ایک ٹی وی چینل سے گفتگو میں ڈاکٹر شیر افگن نے کہا کہ حکومتی اقدام ایمرجنسی اور مارشل لاء کی ملی جلی شکل ہے، سپریم کورٹ نے دہشتگردی میں ملوث افراد کو رہا کیا، سرکاری اداروں کے سربراہوں کی تذلیل کی، سپریم کورٹ کا کوئی اقدام درست نہیں تھا، عدالت نے کونسا کام ٹھیک کیا ہے، آئینی اور دستوری صدر کے کیس کی دوبارہ سماعت شروع کر دی گئی، شیر افگن نیازی نے کہا کہ ذرائع ابلاغ حکومت کیخلاف کام کر کے ملک دشمن عناصر کی مدد کر رہے تھے، صبح کو ٹی وی دیکھ کر لوگوں کا بلڈ پریشر زیادہ یا کم ہو جاتا تھا اور ذرائع ابلاغ نے اپنے اختیارات سے تجاوز کیا، اس صورت میں ایمرجنسی کا نفاذ ضروری ہوگیا تھا اور موجودہ حالات میں یہ قدم اٹھایا جانا تھا۔

__________________