کراچی (ٹی وی رپورٹ) جیو کے پروگرام ”آج کامران خان کیساتھ“ کے میزبان نے انکشاف کیا ہے کہ معاشی بدحالی، حکومتی کرپشن اور سیلاب کی بدحالی کی وجہ سے اسلامی جمہوریہ پاکستان معاشی طور پر دیوالیہ ہونے والا ہے۔ انہوں نے بتایا کہ یہ خطرناک خبر وزیر خزانہ ڈاکٹر حفیظ شیخ نے گزشتہ ماہ وزیراعظم گیلانی کی زیر صدارت اعلیٰ سطح کے اجلاس کو سنائی جس میں افواج پاکستان کے سربراہان سمیت حکومت پاکستان کے اعلیٰ ترین افسران سر جوڑ کر بیٹھے تھے۔100 رکنی کابینہ کے ساتھ پاکستان پر حکومت کرنے والے وزیراعظم گیلانی کو صاف صاف بتایا دیا گیا کہ ملک اب مزید افراتفری ، مالیاتی کرپشن ، اقربا پروری اور سرکاری عیاشیوں کا متحمل نہیں ہوسکتا اس لئے اگر پاکستان کو بچانا ہے تو ان تمام چیزوں کا خاتمہ ضروری ہے۔

وزیرعظم نے وعدہ کیا کہ وہ سرکاری کارپوریشنز اور دوسرے سرکاری عہدوں کو خاص لوگوں کے نرغوں سے نکال کر ایماندار پیشہ ورانہ شہرت کے حامل لوگوں کے حوالے کریں گے مگر قومی تاریخ کے اس خطرناک موڑ پر بھی وزیراعظم گیلانی اور ان کے سیاسی سرپرست ان وعدوں کے برعکس کام کرتے نظر آرہے ہیں اور اس کا انجام پاکستان کے لئے اچھا نہیں ہوگا پاکستان میں اہم عہدے قابل، دیانتدار اور غیر جانبدار لوگوں کے پاس ہوں وزیراعظم ہمیشہ اس کے حامی رہے ہیں مگر اس سلسلے میں انہوں نے قوم سے متعدد بار جو وعدے کئے وہ پورے ہوتے نظر نہیں آرہے۔ یہ وعدہ نہ ماضی میں پورے ہوئے اور نہ ہی آج پورے ہوتے نظر آرہے ہیں ۔ ڈاکٹر حفیظ شیخ نے یہاں تک کہہ دیا کہ حکومت پاکستان کے پاس شاید اتنی رقم بھی نہ ہو کہ وہ اپنے وفاقی ملازمین کی تنخواہیں بھی ادا کرسکے اس لئے فوری طور پر اقدامات کئے جائیں۔ کابینہ کو کرپٹ لوگوں سے پاک کریں اور سرکاری عہدوں پر کام کرنے والے کرپٹ افسران کو فارغ کرکے سرکاری کارپوریشنز کو پیشہ ورانہ طریقے سے چلائیں۔

وزیراعظم گیلانی نے حامی تو بھرلی لیکن ایسا اب تک نہیں کیا بلکہ ان کے اقدامات ان کی باتوں کے منافی نظر آرہے ہیں جس کا سب سے بڑا ثبوت OGDC کے سربراہ کی حیثیت سے ان کے دوست عدنان خواجہ کا تقرر ہے جو مالی بے ضابطگیوں پر سزا یافتہ ہے اور حالیہ دنوں میں سپریم کورٹ سے ضمانت پر رہا ہوا ہے۔ وزیراعظم کے اس دیرینہ دوست کی تعلیمی قابلیت بمشکل ایف سی ہے۔ وزیراعظم نے یہ اقدام ایک ایسے وقت میں اٹھایا جب ان کی کابینہ کے اپنے وزیر خزانہ حفیظ شیخ نے ملک میں معاشی ابتری پیدا ہونے کی خطرناک اطلاع دی ہے۔ معاملہ صرف یہیں تک محدود نہیں ہے بلکہ وفاقی وزیر تجارت مخدوم امین فہیم کے دوست اور دبئی کے ایک نائٹ کلب کے سابق منیجر ایاز خان نیازی کو NIC کا سربراہ بنا دیا گیا جس کے بعد ایسا لگ رہا ہے کہ NIC ایک ریئل اسٹیٹ کا کاروبار کرنے والا ادارہ بن گیا ہے۔ ایاز خان نے اپنا تقرر ہوتے ہی رنگ دکھانا شروع کردیا ہے اور اب تک کئی سودوں میں اربوں روپے کے گھپلے کرچکے ہیں۔

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com