عبدالقدوس

حکومت تمام سیاسی جماعتوں کو یکساں سیاسی مواقع فراہم کرے، یورپی مبصر مشن
اسلام آباد( جنگ نیوز) پاکستان کے دورے پر آئے ہوئے یورپی یونین کے الیکشن مبصر مشن کے سربراہ مائیکل گہلر نے کہا ہے کہ حکومت پاکستان سرکاری ٹی وی پر تمام سیاسی جماعتوں کو یکساں موقع فراہم کرے، دھاندلی کی منصوبہ بندی کے حوالے سے پیپلز پارٹی کی طرف سے 60 صفحات پر مشتمل دو خطوط موصول ہوئے ہیں جن کا جائزہ لے رہے ہیں۔ ایک نجی ٹی وی سے گفتگو کرتے ہوئے مائیکل گہلر نے کہا ہے کہ ہم الیکشن کے عمل کی مانیٹرنگ کے لئے 27 دسمبر کی شام پاکستان پہنچنے والے تھے اور رات 8 بجے بے نظیر سے پہلی ملاقات طے تھی تاہم انہیں ملاقات سے قبل ہی قتل کر دیا گیا۔ انہوں نے کہا کہ بے نظیر کے قتل کے بعد کے پیدا ہونے والے حالات میں یہ ممکن نہیں تھا کہ انتخابات مقررہ تاریخ پرکرائے جاتے اس کی و جہ سے حکومت کو ڈیڑھ ماہ کے لئے الیکشن ملتوی کرانا پڑے ۔انہوں نے کہا کہ ہم الیکشن کمیشن کے ضابطہ اخلاق اور ناظمین کی جانب سے انتخابی عمل پر اثر انداز ہونے سے متعلق مختلف سیاسی جماعتوں کے الزامات کا جائزہ لے رہے ہیں۔برسلز میں یورپی یونین کی خاتون ترجمان کرسٹینا ہوفمان کی ترجمان نے بتایا کہ پہلے سے زیادہ مبصروں پر مشتمل ایک ٹیم پہلے سے موجودہ یورپی الیکشن مشن کی جگہ لے گی۔ ترجمان نے کہا کہ یورپی یونین کی خارجہ تعلقات کے کمشنر بینا فریرو والڈنر نے مبصر مشن میں توسیع کی ہے تاکہ اسے تنظیم کا مکمل مبصر مشن قرار دیا جاسکے۔ مشن کے سربراہ یورپی پارلیمنٹ میں جرمن رکن مائیکل گہلر ہوں گے جو پہلے ہی اسلام آباد میں موجود ہیں۔ یورپی یونین کے گیارہ ماہرین کی بنیادی ٹیم اسلام آباد میں قیام کرے گی اور حالات ساز گار ہونے کی صورت میں آئندہ چند روز میں طویل المدت قیام کے لئے مزید 50 مبصر پاکستان پہنچ جائیں گے۔