ایک اعلی حکومتی عہدے دار کے مطابق حکومت پاکستان نے انٹرپول سے درخواست کی ہے کہ دہشت گردی اور دیگر جرائم سے نمٹنے کے لئے حکومت کو جی میل ، یاہو ، ہاٹ میل کی معلومات تک فوری اور آسان رسائی فراہم کی جائے۔اس سلسلہ میں حکومت کی جانب سے پاکستانی عدالتوں کے حکم نامے بھی پیش کئے گئے ہیں۔

حکومت پاکستان کی طرف سے رحمان ملک نے انٹرپول کے چیف کو ایک خط لکھا ہے جس میں اس بات پر زور دیا گیا ہے کہ گوگل جیسے عالمی اداروں کو اس بات کا پابند بنایا جائے کہ وہ پاکستانی عدالتوں کے احکام پر عمل کریں۔ وزیر داخلہ کا کہنا تھا کہ اکثر یہ کمپنیاں یا تو جواب ہی نہیں دیتیں یا پھر امریکی عدالت کا حکم نامہ طلب کرتی ہیں۔

حکومت کا اس بات پر یقین ہے کہ حساس معلومات کی نقل و حمل کے لئے طالبان اوردوسرے دہشت گرد ای میل کا استعمال کرتے ہیں۔

حکومت پاکستان کی جانب سے انٹرپول کو لکھے گئے ایک خط میں حکومت نے موقف اختیار کیا کہ دہشت گردی اور دیگر جرائم کے روک تھام کے لئے ان کی ای میلز تک رسائی وقت کی اہم ترین ضرورت ہے۔

اس سے قبل پاکستانی میڈیا کی جانب سےوزیر داخلہ رحمان ملک کے حوالے سے خبر نشر کی گئی تھی۔ جسکے مطابق رحمان ملک نے گوگل پاکستان کو متنباہ کیا ہے کہ وہ حکومت کے ساتھ تعاون کرے ورنہ پاکستان میں اسے بند کر دیا جائے گا۔

اس حوالے سے پاکستان میں گوگل کے نمائندے بدر خشنود نے کسی قسم کے تبصرہ سے گریز کیا ہے۔

یہاں یہ بات قابل ذکر ہے کہ حال ہی میں پی ٹی اے کی جانب سے محفوظ وی پی این یا کسی بھی دوسرے محفوظ انٹرنیٹ کے نظام کو کے استعمال کو ممنوع قرار دے دیا گیا ہے۔حکومت کے ان اقدامات کو کڑی تقید کا سامنا بھی کرنا پڑ رہا ہے۔

یہ بات بھی قابل غور ہے کہ گوگل کی پالیسی کے مطابق کمپنی قانونی طور پر اس بات کی پابند ہے کہ وہ قانون نافذ کرنے والے اداروں کے ساتھ تعاون کرے۔ لیکن یہ تعاون کسی مخصوص واقعہ یا ایک فرد کی ای میلز کے لئے ہی ہو سکتا ہے ۔

اسکے برعکس رحمان ملک کی خواہش ہے کہ وہ تمام ای میلز تک رسائی حاصل کر سکیں جو بظاہر ناممکن ہے۔

اپ ڈیٹ: ایکسپریس ٹرائیبون کی جانب سے جاری کردہ ویڈیو میں رحمان ملک نے واضح الفاظ میں کہا ہے کہ گوگل اور یوٹیوب حکومت کی مدد نہیں کر رہے۔

__________________
ناراضگی ظاہر کرنا دل میں برائی رکھنے سے بہتر ہے۔