حکومت مخالف تحریک کو روکنے کیلئے معزول ججزکوانتخابات تک رہا نہ کرنیکا فیصلہ



لاہور(جنگ نیوز) حکومت کیخلاف تحریک میں تیزی کو روکنے کیلئے پی سی او کے تحت حلف نہ اٹھانے والے تمام ججز کو عام انتخابات تک رہا نہ کرنے کا فیصلہ کر لیاگیاہے۔جبکہ پنجاب میں ایک اعلیٰ حکومتی شخصیت کی مخالفت کے بعد پی سی او کے تحت حلف نہ اٹھانے والے ججز سے زبردستی کمانڈو ایکشن کیذریعے رہائش گاہیں خالی کروانے کے فیصلے پر بھی عملدرآمد روکدیا گیا۔ذرائع کے مطابق حکومت کو بعض اداروں کی طرف سے یہ اطلاع دی گئی کہ اگر پی سی او کے تحت حلف نہ اٹھانے والے ججز کو انتخابات سے قبل رہا کر دیا گیا تو اس سے حکومت کو سخت مشکلات کے ساتھ ساتھ ق لیگ کو بھی بری طرح شکست کا سامنا کرنا پڑ سکتا ہے۔کیونکہ یہ ججز اگر حکومت کیخلاف تحریک میں شامل ہو گئے تو پھر حالات کو قابو کرنا مشکل ہو جائے گا اور اس سے حکومت کیخلاف نفرت میں بھی اضافہ ہوگا۔ان خدشات کے باعث یہ فیصلہ کیا گیا ہے کہ ان جج صاحبان کو آئندہ انتخابات تک رہا نہیں کیا جائیگا۔ذرائع کے مطابق گزشتہ ماہ بھی حکومت نے پی سی او کے تحت حلف نہ اٹھانے والے ججز کو رہا کرنے کا فیصلہ کیا تھا لیکن ق لیگ نے اس کی بھر پور مخالفت کی تھی۔ذرائع کے مطابق چند دن قبل حکومت نے جی او آر کالونی میں واقع پی سی او کے تحت حلف نہ اٹھانے والے ججز سے زبردستی رہائش گاہیں خالی کروانے کافیصلہ کیا تھا۔اوراس سلسلے میں جی او آر میں عام افرادکا داخلہ بھی بند کردیا گیا تھا۔تاہم اس دوران پنجاب کی ایک اعلیٰ حکومتی شخصیت نے اس کی بھر پور مخالفت کرتے ہوئے ججز سے مذاکرات کے ذریعے رہائش گاہیں خالی کروانے پر زور دیا۔اس لیے حکومت فی الحال اپنے فیصلے سے دستبردار ہو گئی ہے۔