اسلام آباد(ایجنسیاں) حکومت نے نجی ٹی وی چینلز کی بندش کے بعدبڑھتے ہوئے اندرونی اور بیرونی دباؤ کا توڑ کرنے کیلئے ٹی وی مالکان کی تنظیم پی بی اے کو توڑنے اور میڈیا کو تقسیم کرنے کی پالیسی اپنانے کا فیصلہ کیا ہے۔ وزارت اطلاعات کے ذرائع کے مطابق اس پالیسی کے تحت بعض نجی چینلز کی نشریات مرحلہ وار بحال کی جائیں گی، تاکہ بڑھتے ہوئے احتجاج کو کمزور کیا جاسکے اور دیگر چینلز کو تنہا کردیا جائے۔ اس سلسلے میں ایک نیوز چینل کی نشریات بدھ سے اسلام آباد میں بحال کردی گئی ہیں۔ ذرائع کے مطابق ایک اور بڑے ٹی وی چینل کی نشریات آئندہ ایک دو دنوں میں بحال کردی جائیں گی تاکہ ان چینلز سے وابستہ صحافی اور انتظامیہ حکومت کے خلاف جاری احتجاج کا حصہ نہ رہ سکیں۔ذرائع سے معلوم ہوا ہے کہ پیمرا نے اپنا ایک ضابطہ اخلاق خود تیار کیا ہے جس پر عملدرآمد کیلئے وہ نجی ٹی وی مالکان کو انفرادی طور پر دفتر بلا کر ان سے اس ضابطہ اخلاق پر دستخط کرا رہی ہے۔

__________________