حکومت نے توانائی کے بحران پر قابو پانے کیلئے ڈیموں کی تعمیر کیلئے باضابطہ مہم شروع کرنے کا فیصلہ کیا ہے جن کی تکمیل سے ملک کو بجلی کی پیداوار کے شعبے میں خود کفیل بنایا جائے گا اور صنعتی اور دوسرے شعبوں کی ضروریات پوری کی جا سکیں گی۔ وزارت پانی و بجلی کے ذرائع کے مطابق اس وقت ملک کو توانائی کے شعبے میں شدید چیلنجوں کا سامنا ہے اور بجلی کی کمی کی وجہ سے روزانہ آٹھ گھنٹے کی لوڈ شیڈنگ کرنا پڑ رہی ہے۔ اس کے علاوہ بجلی کی کمی سے صنعتی، زرعی اور دوسرے شعبوں کی پیداوار بھی متاثر ہو رہی ہے۔ ذرائع کے مطابق گزشتہ حکومت نے بجلی کی پیداوار میں اضافے کیلئے بڑے ڈیم تعمیر کرنے کا دعویٰ کیا تھا لیکن عملی طور پر اس سلسلے میں کوئی واضح اقدامات نہیں کئے جس کی وجہ سے بجلی کا بحران اب شدت اختیار کر گیا ہے۔ اب حکومت بھاشا، منڈا، اکھوڑی اور دوسرے چھوٹے اور بڑے ڈیموں کی تعمیر پر خصوصی توجہ مرکوز کئے ہوئے ہے۔ اس کے علاوہ کرائے کے بجلی گھر حاصل کرنے کا بھی فیصلہ کیا گیا ہے۔ ذرائع کے مطابق اس وقت روزانہ تین سے چار ہزار میگاواٹ بجلی کی کمی ہے۔ بھاشا ڈیم کی تعمیر میں تاخیر کی وجہ سے اس کی لاگت میں بھی اضافہ ہو گیا ہے۔ گزشتہ حکومت نے اس ڈیم کیلئے اراضی کے حصول کیلئے دو ارب 60 کروڑ روپے رواں مالی سال کے سالانہ ترقیاتی پروگرام میں مختص کئے تھے۔ اس کے علاوہ کالا باغ، منڈا اور کرم تنگی سمیت پانچ بڑے ڈیموں کی تعمیر کیلئے سالانہ ترقیاتی پروگرام میں دس ارب روپے مختص کئے گئے تھے لیکن ان منصوبوں پر فنڈز خرچ نہ ہو سکے۔ ذرائع کے مطابق موجودہ حکومت ڈیموں کی تعمیر اور بجلی کی پیداوار کے منصوبوں میں غیر ملکی سرمایہ کاری کی حوصلہ افزائی کر رہی ہے۔ اس کے علاوہ اس مقصد کیلئے امدادی اداروں سے بھی رقوم حاصل کی جائیں گی۔ حکومت بجلی کے نئے منصوبے شروع کرنے کیساتھ ساتھ ملک میں توانائی کی بچت کیلئے بھی ایک جامع حکمت عملی پر کام کر رہی ہے اور اس کیلئے کئی منصوبوں کا اعلان بھی کیا ہے جن پر عملدرآمد سے ملک کو توانائی کے بحران سے نکالنے میں مدد ملے گی اور بجلی کی پیداوار بھی بڑھائی جا سکے گی۔