بھارت کے دارالحکومت دلی میں کشمیر کی صورتحال کا جائزہ لینے اور وہاں پر عوامی بے جینی، احتجاج اور ہلاکتوں پر قابو پانے کے لیے ایک مشترکہ حکمت عملی وضع کرنے کی غرص سے کُل جماعتی اجلاس بغیر کسی بڑی پیش رفت کے ختم ہو گیا ہے۔

اجلاس میں ایک کل جماعتی وفد کشمیر بھیجنے کا فیصلہ کیا گیا، تاہم خصوصی اختیارات کے متنازعہ قانوں ’آرمڈ فورسز سپیشل پاورز ایکٹ‘ پر، جسے ہٹانے یا اس میں ترمیم کرنے کا مطالبہ ریاستی وزیر اعلی عمر عبداللہ نے بھی کیا تھا، کوئی اتفاق رائے ممکن نہیں ہو پایا۔
تقریبا پانچ گھنٹے تک جاری رہنے والا اس اجلاس کے ختم ہونے کے بعد حکومت کی جانب سے جو بیان جاری کیا گیا ہے اس میں کہا گیا ہے کہ حالات کا جائزہ لینے کے ایک آل پارٹی وفد کشمیر جائے گا اور ریاست میں لوگوں کے کیا مطالبات اور انکو کیسا پورا کیا جائے یہ جائزے کے بعد طے کیا جائے گا۔

تمام جماعتوں نے اس بات پر اتفاق کیا کہ دستور ہندو میں اتنی گنجائش ہے کہ اس کے دائرے میں رہتے ہوئے کشمیریوں کے جائز سیاسی مطالبات کو مذاکرات کے ذریعہ پورا کیا جاسکے۔

اس وفد میں کون کون شامل ہوگا اور یہ وفد کب جائے گا اس کے بارے میں فیصلہ بعد میں کیا جائے گا۔
حزب اختلاف کی جماعت بھارتیہ جنتا پارٹی اور اس کی اتحادی شیو سینا نے فوج کے خصوصی اختیارات والے قانون میں نرمی لانے یا اسے ہٹانے کے منصوبے کی زبردست مخالفت کی ہے۔

جموں و کشمیر کے وزیر اعلی عمر عبداللہ جو کہ اس اجلاس میں شامل نہیں تھے۔ ایک لمبے وقت سے وہ اس قانون میں نرمی لانے یا اسے ریاست کے بعض علاقوں سے ہٹانے کا مطالبہ کررہے ہیں۔

نیشنل کانفرنس کے صدر فاروق عبداللہ کا کہنا تھا کہ اجلاس کے نتیجے سے خوش ہیں اور ' کشمیر مسئلے کا حل ایسی بات چیت سے ہی نکلے گا'۔

انکا مزید کہنا تھا ' ہم نے اجلاس میں اپنے مطالبات کو رکھا ہے اور عمر عبداللہ نے کشمیر میں جو کام کیا ہے اس کی وزیر اعظم نے تعریف کی ہے'۔
وہیں پی ڈی پی کی صدر محبوبہ مفطی کا کہنا تھا کہ وہ وزیر اعظم منموہن سنگھ سے اپیل کریں گی کہ کشمیر کے مسئلے پر غیر مشروط بات چیت ہو'۔

انکا یہ بھی کہنا تھا کہ گزشتہ تین ماہ سے جاری کشیدگی کے دوران جن افراد کو گرفتار کیا گیا ہے انکی رہائی ہو۔

محبوبہ مفتی نے کہا ' لوگ مارے جارے ہیں، کشمیر ایک جیل میں تبدیل ہوچکا ہے، لہذا تمام سیاسی جماعتوں کو اپنے اختلافات سے اوپر اٹھ کر کشمیر کے پیچیدہ مسئلے کا حل تلاش کرنے کی کوشش کرنی چاہیے۔ میں وزیر اعظم سے درخواست کروں گی کہ وہ بات چیت کی پیش کش کے ساتھ کوئی شرط عائد نہ کریں، کشمیر کے نوجوانوں کو رہا کیا جائے، وہاں جاری کریک ڈاؤن ختم کیا جائے، کرفیوں ہٹایا جائے۔ لوگوں کو ہمارے ملک کا زیادہ بہتر انسانی چہرہ نظر آنا چاہیے۔ ہم ٹھوس اقدامات دیکھنا چاہتے ہیں، لیپا پوتی نہیں۔'


کانگریس کی صدر سونیا گاندھی نے کہا کہ ہمیں کشمیریوں کےغصے کی وجہ سمجھنی چاہیے جبکہ وزیر داخلہ پی چدمبرم نے کہا کہ آئین کے دائرے میں رہتے ہوئے کشمیریوں کی آرزؤں کو پورا کرنے کے لیے جو کچھ بھی کیا جاسکتا ہے، کیا جائے گا۔

اجلاس سے قبل وزیراعظم من موہن سنگھ نے ایک بیان میں کہا تھا کہ کشمیر کا مسئلہ بات چیت سے حل ہوگا ’ لیکن بات چیت تشدد سے آزاد ماحول میں ہی ممکن ہے، تشدد رکنا چاہیے۔‘

دلی میں وزیر اعظم کی رہائش گاہ پر ہونے والے اس اجلاس میں تمام جماعتیں شریک ہوئیں تھی۔
قومی سلامتی کے مشیر شیوشنکر مینن اور منموہن سنگھ کے علاوہ کانگریس کی صدر سونیا گاندھی، بی جے پی کے رہنما لال کرشن اڈوانی، نتن گڈکری اور سشما سوراج ، کشمیر کی حکمراں جماعت نیشنل کانفرنس کے رہنما فاروق عبداللہ اور حزب اختلاف کی رہنما محبوبہ مفتی نے بھی شرکت کی۔

محبوبہ مفتی نے اجلاس سے قبل یہ امید ظاہر کی تھی کہ اس میں کسی ایک مخصوص سوال پر غور کرنے کے بجائے کشمیر کے وسیع تر سوال پر غور کیا جائے گا ’ورنہ اس اجلاس کا کوئی مقصد پورا نہیں ہوگا۔‘

اس اجلاس میں بھارت کے زیرِ انتظام کشمیر کے بعض علاقوں میں فوج کے خصوصی اختیارات کے قانون کو واپس لینے اور ایک کُل جماعتی پارلیمانی وفد کو شورش زدہ کشمیر بھیجنے سمیت متعدد اقدامات پر غور کیا جا رہا ہے۔
اجلاس سے قبل حزب احتلاف کی جماعت بھارتیہ جنتا پارٹی نے وزیر اعلی عمر عبداللہ سے مستعفی ہونے کا مطالبہ کیا ہے۔ پارٹی کے رہنما ارون جیٹلی نے کہا کہ ’وزیر اعلی کشمیر کے عوام سے پوری طرح کٹ چکے ہیں اور وہ موجودہ صورتحال میں پوری طرح ناکام ثابت ہوئے ہیں۔‘

بی جے پی کے رہنما ایل کے اڈوانی نے بھی کشمیر کی صورتحال کے لیے مرکزی حکومت پر سخت نکتہ چینی کی ہے اور متنبہ کیا ہے کہ وہ کشمیر میں فوج کے خصوصی اختیارات میں کسی طرح کی بھی کمی کرنے کی کوشش نہ کرے۔’ایک طرف آپ علیحدگی پسندوں کو کھلی چھوٹ دے رہے ہیں اور دوسری جانب آپ سیکیورٹی فورسز کے ہاتھ باندھ دینا چاہتے ہیں۔ یہ ہمیں قابل قبول نہیں ہے ۔‘

اس کُل جماعتی اجلاس کے بعد توقع کی جا رہی تھی کہ مرکزی حکومت کشمیر میں صورتحال کو معمول پر لانے کے لیے متعدد اقدامات کرنے کا اعلان کرے گی۔ یہ اجلاس کشمیر کی حالیہ بے چینی کے پس منظر میں ہوا ہے جس میں گزشتہ تین مہینوں میں سیکیوریٹی فورسز کے ہاتھوں اسی سے زیادہ شہری مارے گئے ہیں۔

کشمیر کے وزیر اعلی عمر عبدللہ نے فوج کے خصوصی اختیارات ختم کرنے اور ریاست کو وسیع تر اختیارات دینے کا مطالبہ کیا ہے۔ وہ کانگریس کے اتحادی ہیں لیکن مرکز کے طریقہ کار سے وہ کافی ناخوش ہیں۔
بی بی سی اردو

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !