خواہشیں آزار خودکشی

کسی بھی معاشرے کی طبقاتی تقسیم میںدرمیانی یا سفید پوش طبقہ بہت اہم ہوتا ہے۔ یہ وہ طبقہ ہے جو معاشرے کی اقدار اور روایات کی پاسداری کرتا ہے اوران کی حفاظت کرتاہے ۔ اگر معاشرہ ایک جسم ہے تواس تمام تر حسیات جسم کے اسی حصے میں پائی جاتی ہیں۔ یہی وہ طبقہ ہے جو کسی قوم کے مزاج کا آئینہ ہوتا ہے۔ دُنیا کے اکژ انقلابات بھی اسی طبقے کی جدوجہد کا ثمر ہیں۔ یہ طبقہ معاشرے کے بقیہ دونوں طبقوںکے درمیان ایک پُل بھی ہے اور معاشرے کا توازن برقرار رکھنے کا ایک ذریعہ بھی۔اس طبقے کا سکون تباہ ہو جائے تو پورا معاشرہ تباہی کے دہانے پر کھڑا ہو جاتا ہے۔

سفید پوش طبقہ بہت صابر اور شاکر ہوتا ہے اوپرسے پُر سکون لیکن اندر سے کشمکش کا شکار ۔ اس طبقے کے افراد کے اندر طبقاتی کشمکش کا لاوا پکتا رہتا ہے جو کسی سوئے ہوئے آتش فشاں کی طرح اچانک ہی پھٹ پڑتا ہے۔ ہمارے معاشرے کا سفید پوش طبقہ بھی اپنے اندر لاوا اُبال رہا ہے ۔ دن بدن بڑھتی ہوئی مہنگائی کی تیز آنچ پرنا آسودہ خواہشات تپ رہی ہیں۔سفید پوش طبقے کے لئے یہ ناآسودہ خواہشات جان لیوا آزار بنتی جا رہی ہیں۔اس طبقے کے افراد دن رات کی کڑی محنت سے ترقی کی سیڑھی پر اوپر کی جانب دیکھتے ہیں مگر حالات ایسے ہیں کہ اوپر دیکھتے ہوئے اکثر سر کے بل مایوسی اور غربت کی کھائی میں گرتے جا رہے ہیں۔
وہ بھی ایک سفید پوش تھا

چھٹی ہوتے ہی وہ دفتر سے نکلا اور بس سٹاپ پر لگی بھیڑ میں شامل ہو گیا۔ دس پندرہ منٹ کے انتظار کے بعد بس آئی تو لپک کر اس میں سوا ر ہو گیا۔ بس میں بمشکل کھڑے رہنے کی جگہ ملی اس پر بھی شکر ادا کیا ورنہ اگلی بس بیس منٹ بعد ملتی۔ بس آہستہ آہستہ چلتی رکتی اپنی منزل کی جانب رواں دواں تھی اور وہ اپنے خیالوں کی رو میں ہچکولے کھا رہا تھا۔ آجکل اس کا گھر جانے کو دل نہیں چاہتا تھا۔ گھر پہنچتے ہی سوال کرتی آنکھیں اور مانگتے ہاتھ اُس کا استقبال کرتے تھے۔ بچوں کو روزانہ کوئی کاپی ، کتاب ، قلم یا ور کسی چیز کی ضرورت ہوتی اور اس کی بے وقوف بیوی کو نت نئی فرمائشیں کرنے کی عادت سی پڑ گئی تھی۔اُسے معلوم تھا گھر پہنچتے ہی سب اس کی جانب لپکیں گے اپنی اپنی فرمائشوں کے ساتھ مگر آج وہ خالی ہاتھ تھا اس کے تمام دوستوں نے اُدھار دینے سے انکار کر دیا تھا۔ کچھ نے اپنی تنگ دستی کا ذکر کیا تھا ، کچھ نے پچھلے اُدھار کا اور کچھ نے ٹال دیا تھا۔اس کے گھر والوں کو معلوم نہ تھا کہ وہ ان کی معصوم خواہشات کے لئے کتنی جگہ ہاتھ پھیلا کر آیا ہے۔

کچھ ہی مہینے پہلے اس کی زندگی قدرے پرسکون تھی کہ بیوی کے بار بار ضد کرنے پر اس نے گھر میں کیبل لگوا لی۔اب کیا تھا بیوی شام ہوتے ہی بدیسی چینل لگا کر بیٹھ جاتی اورصبح دفتر جانے سے پہلے اپنی نئی فرمائش اسکے کانوں میں ڈال دیتی۔ یہ فرمائش کبھی چوڑیوں کی ہوتی کبھی جھمکوں کی اور کبھی نیا جوڑا سلانے کی۔ سانپ کی آنت سے لمبے بدیسی ڈراموں میں عورتیں خوب بنی سنوری نظر آتیں۔ دو گھنٹے میں بیوی چار ڈرامے دیکھتی اور ان چار ڈراموں میں چالیس ساڑھیاں ،اتنے ہی زیور کے سیٹ ،رنگ برنگی چوڑیاں اور کتنے ہی نئے ہیئر سٹائل دیکھ لیتی ہے۔ رات بھر اپنے خوابوں میں وہ یہ چالیس ساڑھیاں خود کو پہنے دیکھتی ۔جب کوئی گھر نہ ہوتا تو وہ آئینے کے سامنے اپنے بالوں کے نت نئے انداز بناتی ہے اور میک اپ کر کے دیکھتی ہے۔ پچھلے دو تین روز سے وہ آنکھوں میں لگانے والے رنگین لینس کی فرمائش کئے جا رہی تھی۔ اب بات تو کچھ بڑی نہیں تھی مگر آج کسی نے دو سو روپے بھی اُدھار نہیں دئیے تھے۔ اب گھر جاتے ہی بیوی کی آنکھوں میں سوال ہوگا جس کا جواب اس کے پاس نہیں۔

اس کے خالی ہاتھ دیکھ کر بیوی منہ بسور لے گی اور طعنوں کی بوچھاڑ کرنے لگے گی ۔ شاید روٹھ بھی جائے اور کچھ بعید نہیں صبح ہوتے ہی میکے چلی جائے۔ پھر اس کو منانے کے لئے اس کا بیٹا اسی سال کالج میں داخل ہوا تھا۔ اس کا موڈ روزانہ خراب رہتا ہے۔ کیونکہ اسکوصرف تیس چالیس روپے روزانہ ملتے ہیں۔جو کالج آنے جانے میں ہی خرچ ہو جاتے ہیں ۔ وہ کئی ہفتوں سے موبائل فون کی فرمائش کر رہا ہے۔ اور دبی زبان میں جیب خرچ کم ہونے کا گلہ بھی کرتا ہے۔ اس کے سب دوستوں کے پاس موبائل فون ہیں۔اس کی ماں نے کالج آنے جانے کے لئے اسے دو نئے جوڑے بنا کر دئیے ہیں جو اسے بالکل پسند نہیں۔ اسکا بھی دل چاہتا ہے کہ وہ لڑکوں کے ساتھ کبھی پیزا ہٹ جائے اور کبھی میکڈونلڈ مگرجیب میں پڑے دس دس کے نوٹ تو نان چھولے والی ریڑھی تک ہی لے جا سکتے ہیں۔ اسے لگتا ہے کہ اس کے ماں باپ اپنے فرائض میں کوتاہی کر رہے ہیں وہ جن آسائشوں کا مستحق ہے اسے مہیا نہیں کر رہے۔ اس کی محرومیاں اس کے دل میں تلخی بھر رہی ہیں ۔ وہ گھر میں خاموش رہنے لگا ہے یا تو وہ کسی بات کا جواب نہیں دیتا اور دیتا ہے تو تلخ لہجے میں۔ ماں باپ اس کے رویے کونئے زمانے کے سر تھوپ کر اپنے آپ کو تسلی دے لیتے ہیں۔

اب بس اس کی منزل تک لے آئی تھی ۔ بس کی بریک کے ساتھ اس کی سوچوں کو بھی بریک لگ گئی۔ وہ بس سے اتر کر گھر جانے کی بجائے ایک قریبی پارک میں جا کر بیٹھ گیا۔ اسے اپنے پاوں من من بھر کے معلوم ہو رہے تھے ۔ کبھی جی چاہتا کہ یہاں سے کہیں دور نکل جائے کبھی اپنی جان دینے کا خیال دل میں آتا۔ مگر پھر بیوی بچوں کے بے سہارا ہونے کا خیال آتا۔ اسی کشمکش میں سر پکڑ کر بیٹھا رہا گھڑی پر نظر پڑی تو رات کے گیارہ بج چکے تھے ناچار گھر کی جانب چل پڑا سوچنے لگا بیوی بچے میری سلامتی کے لئے فکر مند ہونگے مگر گھر پہنچتے ہی بیوی کی طنزیہ نگاہوں اور جملوں کا سامنا کرنا پڑا۔ وہ خاموشی سے سر جھکائے اپنے کمرے میں چلا گیااور کچھ کھائے بغیر سونے کا دکھاوا کرنے لگا۔ اس کا خیال تھاکہ بیوی پیچھے پیچھے آئے گی طبیعت پوچھے گی ،کھانا پوچھے گی ۔۔۔مگر ایسا کچھ نہ ہوا وہ منہ پھلا کر بیٹھی رہی اور بچوں کے ساتھ ہی سو گئی

صبح جب کمرے میں آئی تو وہ بستر پر نہ تھا چھت پر پنکھے کے ساتھ جھول رہا تھا

اس نے چھوٹی بڑی خواہشات کے پھندوں سے نجات حاصل کرنے کے لئے موت کے پھندے کو گلے لگا لیا تھا۔اس نے خود تو ہر آزار سے نجات پا لی تھی مگر اپنے لواحقین سفید پوش طبقے سے غریب طبقے میں دھکیل آیا تھا۔
ایسا لگتا ہے کہ چند ہی سالوں میں ہمارے معاشرے میں دو ہی طبقے رہ جائیں گےامیر اور غریب