سری نگر(نیٹ نیوز) مقبوضہ کشمیر میں رمضان المباک کے آغاز پر ہنگاموں میں تین پولیس اہلکار اور ایک عورت جان سے ہاتھ دھو بیٹھی۔ کشمیری لیڈروں نے بھارتی وزیر اعظم کی جانب سے مکمل سیاسی خود مختاری کی پیش کش کو مسترد کر دیا جبکہ بھارت کے اپوزیشن لیڈروں نے کہا ہے وزیر اعظم کو سیاسی خود مختاری کی پیشکش سے پہلے سیاسی جماعتوں کو اعتماد میں لینا چاہئے ۔ منموہن سنگھ نے منگل کے وز کشمیری عوام سے اپیل کی تھی کہ وہ ”امن کو موقع دیں“اور یہ کہ ان کی حکومت بھارتی آئین کے اندر رہتے ہوئے کشمیریوں کو سیاسی خودمختاری دینے کا جائزہ لے گی۔ انہوں نے کہا وہ اس مقصد کے لئے ماہرین کا ایک پینل بنا رہے ہیں جو نوجوانوں کی بیروزگاری کے خاتمے کی تجاویز مرتب کرے گا۔ کشمیر کے سینئر سیاسی لیڈروں نے سیاسی خودمختاری کی پیشکش کو مسترد کر کے کہا ہم پر امن مظاہروں سے اپنے مقاصد کے حصول کی جدوجہد جاری رکھیں گے۔ سابق عسکریت پسند کمانڈر جاوید میر نے کہا ہمارا نصب العین خودمختاری نہیں مکمل آزادی ہے ۔ اعتدال پسند لیڈر میر واعظ عمر فاروق نے کہا ہماری جدوجہد خودمختاری کے لئے نہیں بلکہ حق خودارادیت حاصل کرنے کے لئے ہے۔ ہمیں یہ فیصلہ کرنے کا حق ملنا چاہئے کہ ہم پاکستان کے ساتھ مل کر رہنا چاہتے ہیںیابھارت کے ساتھ، یا آزاد ملک قائم کرنا چاہتے ہیں۔

__________________
جاویداسد