اقوام متحدہ......یہودیوں کی تنظیم نے اقوام متحدہ سے مطالبہ کیا ہے کہ خود کش حملوں کو انسانیت کے خلاف جرم قرار دیا جائے۔سائمن ویسنتھال سینٹر کے بانی ربی مارون ہائر نے غیر ملکی خبر رساں ادارے سے بات کرتے ہوئے بتایا کہ انہوں نے یہ مطالبہ گذشتہ ہفتے پاکستان میں مبینہ خودکش حملے میں جاں بحق ہونے والی محترمہ بینظیر بھٹو کی ہلاکت کے بعد کیا ہے۔انہوں نے کہا کہ ان کی تنظیم اس سلسلے میں جمعہ کو شائع ہونے والے اخبارات نیویارک ٹائمز اور انٹرنیشنل ہیرالڈ ٹریبیون میں پورے صفحہ کے اشتہار ات دینے کا ارادہ رکھتی ہے۔اشتہار ات میں محترمہ بینظیر بھٹو پر حملے کے حوالے سے اقوام متحدہ کے سیکرٹری جنرل کو مخاطب کرتے ہوئے کہا گیا ہے کہ "اب دنیا کو اس سے زیادہ کس چیز کا انتظار ہے". تنظیم نے جنرل اسمبلی سے مطالبہ کیا کہ اس سلسلے میں خصوصی اجلاس بلا کر خودکش حملوں کا حل تلاش کیا جائے۔