صوبائی دارالحکومت لاہور میں ایف آئی اے بلڈنگ اور ایڈورٹائزنگ ایجنسی میں ہونیوالے خودکش دھماکوں میں زخمی افراد کا سرکاری ہسپتالوں میں مناسب طریقے سے علاج نہ ہوسکا۔ ڈاکٹر صاحبان دن میں صرف ایک بار مریضوں کو دیکھ کر جان چھڑانے لگے ہیں جبکہ مریضوں کے لواحقین کو ادویات حاصل کرنے کے لیے ہسپتالوں میں دھکے کھانا پڑتے ہیں۔ ان خودکش حملوں میں کئی مریض اپنی ٹانگوں، بازوؤں سے محروم اور زندگی بھر کے لیے معذور بھی ہوگئے ہیں۔ زخمیوں کی سرکاری ہسپتالوں میں مناسب طریقے سے دیکھ بھال نہ ہونے کی وجہ سے لواحقین سراپا احتجاج بن گئے ہیں۔ ایک مریض نے بتایا کہ ہم بہت غریب لوگ ہیں ڈاکٹر صاحبان ہمیں دوایاں لکھ کر بازار سے لانے کو کہتے ہیں اتنی مہنگائی میں اتنی مہنگی ادویات ہم کیسے خرید سکتے ہیں۔ ہسپتالوں میں ادویات نہیں مل رہیں۔ مریض نے بتایا کہ ہسپتال میں ڈاکٹر کو خود بلانا پڑتا ہے ڈاکٹر خود چیک کرنے نہیں آتے۔ مریضوں نے بتایا کہ سرکاری ہسپتال میں غریب مریضوں کا کوئی پرسان حال نہیں ہے کیونکہ ادویات نہیں مل رہیں اور ڈاکٹر بھی مریضوں کی طرف کوئی توجہ نہیں کر رہے۔ سرکاری ہسپتالوں میں مریضوں کو ایسی ادویات دی جاتی ہیں جنکی بازار میں بہت کم قیمت ہے جبکہ مہنگی ادویات کے لیے بازار سے لانے کو کہا جاتا ہے