خیبر ایجنسی :متحارب گروپوں میں فائر بند ی کے بعد امن معاہدہ ،فوجی آپریشن ٹل گیا
خیبر ایجنسی (نمائندہ جنگ) خیبر ایجنسی میں دو متحارب قبائلی گروپوں میں فائر بندی کے بعد امن معاہدہ ہو گیااور جرگہ کے کامیاب مذاکرات کے بعد لشکر اسلام اور کوکی خیل قبیلے کے درمیان خونریز تصادم اور فوجی آپریشن کا خطرہ ٹل گیا ہے جبکہ سیکیورٹی فورسزچیک پوسٹوں سے ہٹالی گئی ہیں۔ تفصیلات کے مطابق لشکر اسلام اور جمرود کوکی خیل قبیلے کے درمیان 5دنوں سے جاری کشیدگی کے بعد جمعرات کو جرگہ کے کامیاب مذاکرات کے بعد امن معاہدہ طے پاگیا۔ تحصیل پاڑہ سے تعلق رکھنے والے ملک احمد خان‘ مراد‘ ایجنسی کونسلر خیال مست شاہ سمیت ایک درجن کے قریب جرگہ ممبران نے لشکر اسلام کے امیر حاجی منگل باغ کے ساتھ باڑہ میں دو گھنٹے سے زائد مذاکرات ہوئے۔ امن معاہدہ کے مطابق قبیلہ کوکی خیل کے ذیلی شاخ مرحوم ظاہر شاہ کے فرزند اقتدار شاہ اور ان کے خاندان نے تیس نکاتی ایجنڈے کی تائید کی اور آئندہ کیلئے پرامن رہنے اور جرگے سے تعاون کی یقین دہانی کرائی۔ امن معاہدہ کے بعد حکومت نے سکیورٹی اہلکاروں کو چیک پوسٹوں سے ہٹا دیا۔ خیبرایجنسی کے پولیٹکل حکام کے مطابق بدھ کی شام سے شروع ہونیوالی لڑائی جمعرات کوصبح پانچ بجے تک بغیرکسی وقفے کے جاری رہی جسکے دوران متحارب قبائلی گروپوں نے ایک دوسرے کے ٹھکانوں کو ہلکے اوربھاری ہتھیاروں سے نشانہ بنایا،لڑائی میں متعدد مکانات کو بھی نقصان پہنچا اورلڑائی کی وجہ سے جمعرات کوپشاور اور خیبر ایجنسی کے سنگم پر واقع کارخانے مارکیٹ کی سیکڑوں دکانیں بند رہیں۔ بدھ اور جمعرات کی درمیانی شب لڑائی میں شدت پیدا ہونے کے بعد حیات آباد پشاور سے کئی لوگوں نے نقل مکانی کی جبکہ حیات آبادسمیت پشاور کے کئی علاقے بھاری اسلحے کی گھن گرج سے لرزتے رہے۔ لڑائی کے باعث انڈسٹریل اسٹیٹ حیات آباد میں 80کارخانے بند ہو گئے ہیں۔

__________________