اسلامیہ کالج یونیورسٹی کے وائس چانسلر اجمل خان کے اغوا کے خلاف صوبہ خیبر پختونخوا میں تمام یونیورسٹیاں غیر معینہ مدت تک کے لیے بند کر دی گئی ہیں اور اساتذہ نے کہا ہے کہ اگر انھیں جلد بازیاب نہ کرایا گیا تو پھر پاکستان بھر کی یونیورسٹیاں بند کرا دی جائیں گی۔

پشاور میں بی بی سی اردو ڈاٹ کام کے نامہ نگار عزیز اللہ خان کے مطابق مغوی وائس چانسلر اجمل خان کے اغوا کاروں نےگزشتہ روز دوسرا ویڈیو پیغام جاری کیا گیا جس کے بعد اعلیٰ تعلیمی حلقوں میں احتجاجی مظاہرے شروع کر دیے گئے۔ پیر کو اسلامیہ کالج یونیورسٹی میں طلبا اور اساتذہ نے احتجاجی مظاہرہ کیا اور کیمپس کے احاطے میں جلوس نکالا۔ طلبا کا کہنا تھا کہ پولیس نے انہیں کیمپس کے گیٹ پر روک لیا تھا۔

پشاور میں قائم تمام یونیورسٹیاں جن میں پشاور یونیورسٹی، زرعی یونیورسٹی، انجینیئرنگ یونیورسٹی، خیبر میڈیکل یونیورسٹی اور دیگر یونیورسٹیاں کے وائس چانسلرز کا ایک اجلاس بھی منعقد ہوا جس میں صوبے کی تمام یونیورسٹیاں غیر معینہ مدت تک بند رکھنے کی مکمل حمایت کی گئی۔

وائس چانسلر اجمل خان کو کوئی دو ماہ پہلے کیمپس سے اس وقت نامعلوم افراد نے اغوا کر لیا تھا جب وہ گھر سے دفتر کے لیے جا رہے تھے۔ تحریک طالبان پاکستان نے ان کے اغوا کی ذمہ داری قبول کی تھی اور ان کے ویڈیو پیغام بھی جاری کیے ہیں جن میں اجمل خان کو پیغام پڑھتے دکھایا گیا ہے جبکہ پس منظر میں تین مسلح نقاب پوش افراد کھڑے ہوئے دکھائے دیے گئے ہیں۔

اس پیغام میں انہوں نے کہا ہے کہ اغوا کاروں کے مطالبات تسلیم کیے جائیں کیونکہ وہ انھیں بیس نومبر کے بعد جان سے مار دینے کی دھمکیاں دے رہے ہیں۔

اس بارے میں صوبائی وزیر اطلاعات میاں افتخار کا کہنا ہے کہ انھیں اغوا کاروں کے کسی مطالبے کی اطلاع نہیں ہے اور کسی واضح تنظیم کی جانب سے مطالبات سامنے آنے کے بعد ہی کوئی بات کی جا سکتی ہے۔

اسلامیہ کالج یونیورسٹی کی اساتذہ کے تنظیم کے صدر ضیاءاللہ صحرائی نے بی بی سی کو بتایا ہے کہ وائس چانسلراجمل خان کی بازیابی کے لیے وہ حکومت سے رابطے میں تھے لیکن اب جب اجمل خان کی جان کو لاحق خطرات بڑھ گئے ہیں تو انھوں نے مجبوری کے تحت یونیورسٹیاں بند کرنے کی اپیل کی ہے۔ انھوں نے کہا کہ اگر تین سے چار روز میں اجمل خان کو بازیاب نہ کرایا گیا تو اگلے مرحلے میں تمام پاکستان کی یونیورسٹیاں بند کرائی جائیں گی۔

گومل یونیورسٹی کے وائس چانسلر منصور اکبر کنڈی نے بی بی سی کو بتایا ہے کہ اگرچہ تعلیمی سرگرمیاں معطل ہونے سے بچوں کی تعلیم پر برے اثرات مرتب ہوتے ہیں لیکن یہ ایک انسانی المیہ ہے۔ انھوں نے کہا کہ وائس چانسلر اور اساتذہ کو مقدس مقام حاصل ہے لیکن حالیہ دنوں میں ان کی جان کو خطرات بڑھ گئے ہیں جس سے انھیں آنے جانے میں بھی مشکلات درپیش ہیں۔

اسلامیہ کالج یونیورسٹی کے طلباء نے کہا ہے کہ اغوا کے واقعہ کے بعد سے یونیورسٹی میں تعلیمی سرگرمیوں پر اثر پڑا ہے اور آئے روز مظاہرے ہو رہے ہیں لیکن اب تک ان کی بازیابی کے لیے کوئی کوششیں نظر نہیں آ رہیں۔ انھوں نے کہا کہ حکومت اجمل خان کی بازیابی کے لیے بھر پور کوششیں کرے تاکہ وہ اپنی تعلیمی سرگرمیوں جاری رکھ سکیں۔

__________________