مدرسہ دارلعلوم دیوبند میں مجلس شورٰی کے ایک اہم اجلاس کے بعد مولانا غلام محمد وسطانوی کو ادارہ کے مہتمم کے عہدے سے برخاست کردیا گیا ہے۔
مجلس شورٰی کے اجلاس میں مولانا وسطانوی کے تقرری کے مسئلے پر تین ممبران پر مشتمل کمیٹی کو اپنی رپورٹ دینی تھی اور یہ فیصلہ لیا جانا تھا کہ وہ اپنے عہدے پر رہیں گے یا نہیں۔
ایک مقامی صحافی کے مطابق اجلاس میں آٹھ ووٹ مولانا وسطانوی کے خلاف جبکہ پانچ ان کے حق میں ڈالے گئے۔
صحافیوں سے بات کرتے ہوئے مولانا وسطانوی نے کہا ’مجلس شورٰی میں آٹھ لوگوں نےمیرے خلاف ووٹ ڈالے جبکہ چار نے میرے حق میں اور ایک ممبر نے میرے عہدے کو برقرار رکھنے کی بات کہی۔ مجھے دالعلوم کے مہتمتم کے عہدے سے ہٹادیا گیا۔ مجلس شورٰی کا یہ فیصلہ مجھے منظور ہے‘۔
واضح رہے کہ اس برس جنوری میں مجلس شورٰی نے ہی مولانا وسطانوی کو دارلعلوم کا مہتمم مقرر کیا تھا لیکن بعد میں وسطانوی کے گجرات سے متعلق ایک متنازعہ بیان پر دارلعلوم سمیت ملک کی اہم مسلم تنظیموں نے ان پر بےحد تنقید کی تھی۔
مولانا وسطانوی نے مہتمم بننے کے بعد کہا تھا کہ گجرات میں مسلمانوں کے حالات بہتر ہیں اور وہاں کے مسلمانوں کو ماضی کو بھلا کر آگے بڑھنا چاہیے۔
وسطانوی کے اس بیان پر سرکردہ مسلمانوں نے زبردست تنقید کی تھی اور کہا تھا کہ مسلمانوں کے اہم ادارے کے مہتمم کے اس بیان سے یہ پیغام جاتا ہے کہ گجرات میں ہوئے قتل و عام ایک عام بات تھی جس کے لیے ریاست کے وزیر اعلٰی نریندر مودی کو معاف کیا جاسکتا ہے۔
مولانا وسطانوی کے اس بیان کے بعد مجلس شورٰی نے ایک عبوری مہتمم کی تقرری کے علاوہ وسطانوی پر لگے الزامات کی تفتیش کے لیے تین ممبران پر مشتمل ایک کمیٹی تشکیل دی تھی۔
بتایا جاتا ہے اتوار کو ہوئے اجلاس میں مجلس شورٰی نے مولانا وسطانوی کو استعفی دینا کا موقع دیے بغیر ووٹنگ کے ذریعے انہیں انکے عہدے سے برطرف کردیا۔
مولانا وسطانوی کا تعلق گجرات سے ہے اور دارلعلوم کی سو برس تاریخ میں وہ پہلے گجراتی تھے جنہیں مہتم کے عہدہ دیا گیا تھا۔
بعض ماہرین کا خیال ہے کہ وسطانوی ترقی اور جدیدیت کا نظریہ رکھتے ہیں لیکن اپنے غیر ذمہ دارانہ بیان اور سوچ کے سبب انہوں نے ایک اہم موقع گنوا دیا ہے۔
بی بی سی اردو۔
24-07-11, 08:28 PM
Linear Mode
Similar Threads
