بیجنگ ، اُرمچی (جنگ نیوز) چین نے توانائی، معدنیات اور کان کنی کے شعبوں کی ترقی، مالیاتی شعبے میں تعاون اور مواصلات و ٹرانسپورٹ کے رابطوں کو بہتر بنانے کیلئے پاکستان کی معاونت کرنے پر بھرپور آمادگی کا اظہار کیا ہے۔ دونوں ممالک نے دفاعی اشتراک اور دفاعی تعاون کو فروغ دینے پر بھی اتفاق کیا ہے۔ چین نے پاکستان کے مالیاتی اور توانائی کے شعبے میں تعاون اور کان کنی کے شعبے کو وسعت دینے میں مدد فراہم کرنے پر بھی رضامندی ظاہر کی ہے۔ صدر پرویز کے دورہ چین کے اختتام پر جاری ہونے والے مشترکہ اعلامیہ کے مطابق دونوں ممالک نے پانی و بجلی، انجنیئرنگ و ٹیکنالوجیکل سائنسز، کھیلوں، خزانہ، خبروں کے تبادلے، سنگ ہوا یونیورسٹی میں پاکستانی ثقافتی و مواصلاتی مرکز کے قیام، اقتصادی و تجارتی تعاون، سرمایہ کاری میں تعاون اور چین کے خود مختار علاقے سن کیانگ اور پاکستان کے صوبہ سرحد کے درمیان تعاون اور دوستی کے فروغ سے متعلق 10 یادداشتوں پر بھی دستخط کئے گئے۔ اعلامیہ میں دو طرفہ آزاد تجارت کے سمجھوتے کو بھرپور انداز میں بروئے کار لانے کے عزم کا اظہار کیا گیا۔ صدر پرویز کے مطابق دونوں ممالک جلد ہی آزاد تجارت کیلئے ایک اور معاہدہ کریں گے۔ دونوں ممالک نے 15 ارب ڈالر کے تجارتی ہدف کو جلد از جلد حاصل کرنے کیلئے مل کر کام کرنے پر اتفاق کیا۔ اعلامیے کے مطابق پاکستان نے ”ون چائنا پالیسی“ اور تائیوان کی اپنی مادر وطن کو واپسی کیلئے اپنی بھرپور حمایت کا اعادہ کیا، علیحدگی پسندی اور دہشت گردی جیسی منفی قوتوں کی مذمت کی اور انہیں مسترد کردیا۔ پاکستان نے بیجنگ اولمپکس کیلئے شاندار انتظامات کرنے پر چین کی حکومت اور عوام کی بھرپور تعریف کی اور چینی حکومت کو مکمل تعاون اور حمایت کا یقین دلایا۔ دریں اثناء منگل کو یہاں ”چائنا سن کیانگ۔ پاکستان اکنامک فورم“ سے خطاب کرتے ہوئے صدر پرویز نے کاروباری رہنماؤں کو بتایا کہ پاکستان میں توانائی کے شعبے بالخصوص کوئلہ سے پیدا ہونے والی بجلی، شمسی اور پن بجلی کے شعبوں میں سرمایہ کاری کے وسیع امکانات ہیں۔ انہوں نے چینی کاروباری شخصیات کو دعوت دی کہ وہ پاکستان میں مزید سرمایہ کاری کریں، اس سے دو طرفہ تعلقات مزید فروغ پائیں گے۔ صدر نے بینک آف چائنا کو پاکستانی بینکاری کے میدان میں شامل ہونے کی دعوت دی۔ اس موقع پر سنکیانگ کے گورنر نور باقری اور نائب گورنر مسعود قریشی اور پاکستانی وفد کے ارکان بھی موجود تھے۔ مزید برآں، سن کیانگ کے دارالحکومت کے دورے کے موقع پر صدر پرویز نے کہا کہ پاکستان توانائی کی کمی کو پورا کرنے کیلئے نیوکلیئر، ہائیڈل، تھرمل، متبادل ذرائع سمیت توانائی کے تمام وسائل کو بروئے کار لائے گا۔ انہوں نے سولر پینل اور انرجی پلانٹ تیار کرنے والی چینی کمپنی ”سن اوسس“ کا بھی دورہ کیا۔ یہ کمپنی 150 کلو واٹ سولر انرجی سسٹم کے علاوہ سولر توانائی سے متعلق آلات اور مصنوعات تیار کرتی ہے۔

__________________