دلچسپ اور عجیب

آسٹریلوی ہائی کورٹ نے مقدمہ کی سماعت کے دوران خراٹے لینے والے جج کے فیصلے کو بدل دیا
سڈنی ………… آسٹریلوی ہائی کورٹ نے منشیات کے دو سمگلروں کو دی جانے والی قید کی سزاٶں کو ختم کرنے کا حکم دیا جبکہ ان ملزمان کے خلاف مقدمہ کی سماعت کے دوران جج اکثر اونگھتا یا خراٹے لیتا تھا۔ آسٹریلوی ذرائع ابلاغ کے مطابق آسٹریلیا کی ہائی کورٹ نے اپنے فیصلہ میں قرار دیا ہے کہ مقدمہ کی سماعت کے دوران جج کو تمام نکات پر غور کرنا ہوتا ہے جبکہ اس دوران بار بار سونے ، غنودگی کا شکار ہونے یا اونگھنے سے انصاف کے تقاضے پورے نہیں ہوتے اور جیوری منصفانہ فیصلہ نہیں کرسکتی۔ آسٹریلوی ہائی کورٹ نے منشیات کی سمگلنگ کے دو ملزمان رافیل سین اور روبن مس ردادیویا کی اپیلیں منظور کرتے ہوئے 13 سال قید کی سزائیں ختم کر دیں۔ ہائی کورٹ نے قرار دیا کہ مقدمہ کی سماعت کے دوران بار بار اونگھنے اور سونے والے جج کو ریٹائر ہوجانا چاہئے۔ یہ امر قابل ذکر ہے نیند کے مسئلہ سے دوچار جج ڈور 2005ء میں ریٹائر ہوگئے تھے۔
٭٭٭٭٭٭٭٭٭٭





جاپان میں 6 کلوگرام سونے سے تیار کردہ کیلنڈر کی نمائش اور فروخت شروع ہوگئی
ٹوکیو ………… جاپان میں سونے سے تیار کردہ کیلنڈر کی نمائش جاری ہے۔ جاپانی ذرائع ابلاغ کے مطابق سونے کا کیلنڈر جاپانی جیولرناناکاکی کنزوکے نے تیار کیا ہے ۔ 67 انچ لمبے اور 42 انچ چوڑے کیلنڈ کی تیاری میں کل 6 کلوگرام سونا استعمال کیا گیا ہے۔ اس کیلنڈر کی فروخت گزشتہ روز سے شروع کر دی گئی اور مذکورہ کیلنڈر کی قیمت تین لاکھ ڈالرز رکھی گئی ہے۔ کیلنڈر میں باقاعدہ طور پر مہینے دن اور تاریخ کے ہندسے بھی سونے سے لکھے گئے ہیں اور چارٹ نما کیلنڈر دور سے ہی چمکتا دکھائی دیتا ہے۔ خاتون جیولر ناناکاکی کنزوکے کا کہنا ہے کہ وہ کیلنڈرز زیادہ فروخت ہونے کی صورت میں مختلف سائز کے مزید کیلنڈرز بنائیں گی