13 نومبر 2010
بون ( مانیٹرنگ ڈیسک )جرمنی میں بچوں کی پیدائش کی شرح میں ریکارڈ حد تک کمی ہوئی ہے۔ جو بڑھتی ہوئی آبادی کی طرح ہی معیشت کیلئے بھی خطرہ قراردی جارہی ہے ۔ تازہ ترین رپورٹ کے مطابق جرمنی میں گزشتہ برس پیدا ہونے والے بچوں کی سالانہ تعداد 1945ءکے بعد سے لے کر اب تک کی اپنی کم ترین سطح پر رہی۔قریب 83 ملین کی آبادی والے ملک جرمنی میں شرح پیدائش میں مسلسل کمی کی وجہ سے اوسط عمر میں مسلسل اضافہ دیکھا جا رہا ہے۔ اس صورتحال کو یورپ کی اس سب سے بڑی معیشت کی شرح نمو کے لئے شدید خطرے سے تعبیر کیا جا رہا ہے۔دوسری عالمی جنگ کے دوران شرح پیدائش میں ہونے والی ریکارڈ کمی کے باعث جرمنی میں یہ خلاءتب تارکین وطن کو بلا کر پر کیا گیا تھا تاہم اب جبکہ جرمنی میں غیر ملکی تارکین وطن سے متعلق سخت ضوابط موجود ہیں، یہ صورتحال خاصی تشویشناک سمجھی جا رہی ہے۔جرمن وفاقی دفتر شماریات کے مطابق گزشتہ دس برسوں میں جرمنی میں بچوں کی پیدائش میں ایک لاکھ کی کمی ہوئی ہے۔ ماہرین کا کہنا ہے کہ اگر بچوں کی پیدائش کی شرح میں یہی کمی جاری رہی تو سن 2050ءمیں جرمنی کی کل آبادی کم ہو کر 50 ملین تک رہ جائے گی۔انہی خدشات کو دیکھتے ہوئے سن 2007ءمیں جرمن حکومت کی طرف سے ’والدین کے لئے رقم‘ کے نام سے ایک پروگرام بھی شروع کیا گیا تھا، جس کے تحت ملازمت پیشہ جوڑوں کو کسی بچے کی پیدائش پر کئی ماہ تک مالی مدد فراہم کی جاتی ہے۔

__________________
جاویداسد