ملبورن......بھارت کے ٹیسٹ بیٹسمین وی وی ایس لکشمن کا کہنا ہے کہ وہ اپنے آخری دورہ آسٹریلیا کو یاد گار بنانا چاہتے ہیں اور وہ آسٹریلیا کے خلاف اپنی عمدہ بیٹنگ فارم کے سلسلے کو مزید آگے بڑھانا چاہیں گے۔حیدرآباد سے تعلق رکھنے والے وی وی ایس لکشمن کا آسٹریلیا کے خلاف ہمیشہ کی عمدہ ریکارڈ رہا ہے،آسٹریلیا کے خلاف16 ٹیسٹ میچوں میں لکشمن52.03کی اوسط سے1457رنز اسکور کرچکے ہیں ،2003-04 کے دورہ آسٹریلیا میں لکشمن نے بارڈر گاواسکر سیریز کے چار ٹیسٹ میچوں میں494رنز بنائے تھے۔بھارت کیلئے 86ٹیسٹ میچوں میں 11سنچریوں اور 30نصف سنچریوں کے ساتھ 5292رنز بنانے والے لکشمن کا کہنا ہے کہ موجودہ دورہ ان کے کیرئیر کا آخری دورہ آسٹریلیا ہو سکتا ہے اور ان کی خواہش ہے کہ اسے یاد گار بنائیں۔پاکستان کے خلاف حالیہ سیریز میں لکشمن نے3ٹیسٹ میچوں میں ایک سنچری اور ایک نصف سنچری کے ساتھ209رنز بنائے تھے۔ان کا کہنا ہے کہ ان کی موجودہ فارم اچھی ہے اورا نہیں پوری امید ہے کہ آسٹریلیا میں وہ اپنی سابقہ کارکردگی کو دہرانے میں کا میاب رہیں گے۔

__________________