نئی دہلی…بھارت میں تین سے14اکتوبر تک ہونے والے دولتِ مشترکہ کھیل شروع ہونے سے قبل ہی شرکت کرنے والے تمام ممالک اور کھلاڑیوں کی جانب سے تنقید کی زد میں ہیں۔جہاں ایک طرف بھارت میں ہونے والے دولتِ مشترکہ کھیلوں کے لیے ناقص سکیورٹی اور کھلاڑیوں کو دی جانے والی سہولیات پر دنیا بھر کے میڈیا پر بے پناہ سوالات اٹھائے جارہے ہیں اور کئی ممالک نے شرکت سے انکار کردیا ہے، وہیں اب میزبان ملک بھارت کے لیے ایک نئے مسئلے نے جنم لے لیا ہے کیونکہ دولتِ مشترکہ کھیلوں کے وقت پر انعقاد اور اسٹڈیم کی تیاری کے لیے بچوں سے بھی مزدوری کروائی جارہی ہے۔گذشتہ دنوں ایک فوٹو گرافرکی جانب سے لی گئیں تصاویر میں ایک جانب جواہرلال نہرو اسٹڈیم میں کم عمر بچے کرسیاں نصب کرتے دکھائی دے رہے ہیں تو دوسری جانب تین سے چار سال کے بچے بیلچے سے کھدائی اور اینٹیں اٹھاتے واضح طور پر نظر آرہے ہیں جبکہ کہیں صرف6سے7سال کی لڑکیاں لان کی گھاس کاٹ رہی ہیں۔دولتِ مشترکہ کھیل کے آرگنائزر مزدوری کے لیے آنے والے مزدوروں کویومیہ210 بھارتی روپے اجرت کے ساتھ زائد پیسوں ،دودھ اور کھانے کا لالچ دے کر بچوں کو بھی ساتھ کام لانے کی ترغیب دے رہے ہیں تاکہ کھیلوں کا انعقاد وقت پر ممکن بنایا جاسکے۔اس حرکت کو چھپانے کے لیے دولتِ مشترکہ کھیلوں کے انتظامی اور سکیورٹی افسران نے اسٹڈیمز میں کام کرتے بچوں کی تصاویر بنانے والے فوٹو گرافر کا کوریج پاس منسوخ کرتے ہوئے کیمرا بھی قبضے میں لے لیا ہے۔واضح رہے کہ چند سال قبل فٹ بال کے سب سے بڑے مینوفکچرر مانے جانے والے پاکستان کے شہر سیالکوٹ سے فٹ بال کی درآمد پر فیفا کی جانب سے پابندی عائد کردی گئی تھی جس کی بنیادی وجہ فٹ بال فیکٹریوں میں بچوں سے مزدوری کروانے کا انکشاف تھا ۔لہٰذا اب دیکھنا یہ ہے کہ بھارت میں دولتِ مشترکہ کھیلوں میں چائلڈ لیبر کے حوالے سے سامنے آنے والے انکشافات پر کھیلوں کی عالمی تنظیموں کی جانب سے کیا اقدامات اُٹھائے جاتے ہیں۔

__________________
جاویداسد