لاہور (نمائندہ جنگ) مسلم لیگ پنجاب کے صدر اور سابق وزیر اعلیٰ چوہدری پرویز الٰہی نے کہا ہے کہ صدر کے مواخذہ کی مضحکہ خیز بات کرنے والے ہوا میں تیرچلا رہے ہیں، انہیں زمینی حقائق کا ادراک نہیں ہے ،مجھے یقین ہے کہ آئندہ الیکشن میں عوام پیپلز پارٹی سمیت اس جیسی ملک دشمن قوتوں کا نہ صرف سختی سے محاسبہ کریں گے بلکہ انہیں ایک مرتبہ پھر ملک سے فرار ہونے پر مجبور کردیں گے اور ان کا دوتہائی اکثریت حاصل کرنے کا خواب چکنا چور ہو جائیگا۔ وہ لاہور میں اپنی رہائش گاہ پر مسلم لیگی وفود سے ملاقات کے دوران گفتگو کررہے تھے۔انہوں نے کہا کہ عام انتخابات کے بعد پاکستان مسلم لیگ کی قیادت میں منتخب ادارے مضبوط اور جمہوریت مستحکم ہوگی۔انہوں نے کہا کہ ہم عوام کی طاقت سے وفاق کیخلاف ہونے والی ہر سازش کو ناکام بنادیں گے اور ان کا منہ توڑ جواب دیں گے۔انہوں نے کہا کہ صدر کے مواخذے کی بات کرنے والوں کو یہ معلوم ہونا چاہئے کہ صدر پرویز مشرف کو عوام اور اس کے حقیقی نمائندوں کی مکمل اور بھرپور حمایت حاصل ہے۔

__________________