سپریم کورٹ آف پاکستان کے نو رکنی ایک بینچ نے صدر کے دو عہدوں سے متعلق پٹیشنوں کی سماعت کے لیے فل کورٹ بینچ تشکیل دینے کی درخواستیں مسترد کر دی ہیں۔
صدر جنرل پرویز مشرف کے دو عہدوں کے خلاف درخواستوں کی سماعت اب جسٹس بھگوان داس کی سربراہی میں کام کرنے والا یہی نو رکنی بینچ کرے گا۔

فل کورٹ تشکیل دینے سے متعلق درخواستیں جماعت اسلامی کے امیر قاضی حسین احمد اور تحریک انصاف کے سربراہ عمران خان نے دائر کی تھیں۔

حکومت کی طرف سے اٹارنی جنرل ملک محمد قیوم اور صدر جنرل مشرف کی نمائندگی کرنے والے سینئر قانوان دان شریف الدین پیرزادہ نے ان درخواستوں کی مخالفت کی۔

اٹارنی جنرل ملک محمد قیوم نے کہا کہ صدر کے دو عہدوں کے بارے میں آئینی درخواستوں کی سماعت نو رکنی بینچ کے سامنے ہی ہونی چاہیے۔ انہوں نے کہا کہ قاضی حسین احمد اور عمران خان کو بینچ کے بارے میں اعتراض اس وقت کرنا چاہیے تھا جب چھ ستمبر کو اس کی تشکیل ہوئی تھی۔

انہوں نے کہا کہ سن دو ہزار پانچ میں صدر کے دو عہدوں کے بارے پاکستان لائرز فورم کی آئینی درخواست کی سماعت ایک پانچ رکنی بینچ نے کی تھی جبکہ سن دو ہزار دو میں قاضی حسین احمد کی اسی نوعیت کی پٹیشن کی سماعت ایک نو رکنی بینچ کے سامنے ہوئی تھی۔ انہوں نے کہا کہ اس وقت کسی فریق نے فل کورٹ بینچ تشکیل دینے کی درخواست نہیں کی تھی۔

فل کورٹ بینچ کی تشکیل کے لیے دائر کی گئی درخواستوں کے حق میں دلائل دیتے ہوئے عمران خان کے وکیل حامد خان نے عاصمہ جہانگیر کیس سے لیکر چیف جسٹس کیس تک دس ایسے مقدمات کا حوالہ دیا جن کی سماعت فل کورٹ بینچ کے سامنے ہوئی تھی۔

قاضی حسین احمد کے وکیل اکرم شیخ نے کہا کہ انہیں نو رکنی بینچ میں شامل سپریم کورٹ کے ججوں کی اہلیت پر کوئی شک نہیں ہے۔ انہوں نے کہا کہ وہ فل کورٹ بینچ کی تشکیل اس لیے چاہتے ہیں کیونکہ صدر کے دو عہدوں سے متعلق آئینی درخواستیں ملک کے سولہ کروڑ عوام کے جمہوری حقوق سے متعلق ہیں۔
انہوں نے کہا کہ وہ چاہتے ہیں کہ ان آئینی درخواستوں پر فیصلے سے ظاہر ہو کہ پوری سپریم کورٹ اس فیصلے میں شامل ہے۔

پاکستان لائرز فورم کے سربراہ اے کے ڈوگر نے کہا کہ نو رکنی بینچ تشکیل دیتے ہوئے چیف جسٹس نے اپنے انتظامی اختیارات استعمال کیے ہیں اور یہ ان کی طرف سے دیا جانے والا کوئی عدالتی فیصلہ نہیں ہے۔

بی بی سی