دہشت گر دی کیخلاف جنگ ،پاکستان سے ہر 10 لاکھ ڈالر سے زائد اخراجات کی رسید طلب کی جائے،امر یکی حکام
واشنگٹن ( نیر زیدی/ نمائندہ جنگ) دسمبر میں امریکی وزارت خارجہ اور کانگریس کے اہم اراکین کے اسٹاف کے درمیان ایک خفیہ اجلاس میں اسٹاف ممبروں نے مطالبہ کیا کہ پاکستان سے کہا جائے کہ وہ ہر 10 لاکھ ڈالر یا اس سے زیادہ کے اخراجات کے ساتھ رسیدیں دکھایا کرے، یہاں پاکستان دشمن عناصر نے حال ہی میں یہ الزامات لگانا شروع کئے ہیں کہ پاکستان بڑھا چڑھا کر اخراجات بتا رہا ہے۔ پاکستان نے افغان سرحد اور قبائلی علاقوں میں تقریباً 100,000 فوجیں رکھی ہیں جنکے لئے امریکہ ہر ماہ 80 ملین ڈالر ادا کرتا ہے جو سالانہ ایک ارب ڈالر کے برابر ہے۔ اسسٹنٹ سیکرٹری آف اسٹیٹ رچرڈ باؤچر نے اس سلسلے میں ابھی تک کوئی ایکشن نہیں لیا ہے لیکن پاکستان کے بل ادا کرنیوالے اداروں نے زیادہ جانچ پڑتال شروع کر دی ہے ، ہر ماہ پاکستانی حکام 15 اور 20 صفحات کی اسپریڈ شیٹ پر مشتمل بل اسلام آباد میں امریکی سفارت خانے کو بھیجتے ہیں یہ بل فلوریڈا میں سینٹرل کمانڈ جاتے ہیں جہاں سے یہ واشنگٹن میں وزارت دفاع آتے ہیں اسکے بعد آفس آف بجٹ اینڈ منیجمنٹ میں چیکنگ ہوتی ہے جسکے بعد ڈپٹی سیکرٹری دفاع ان پر دستخط کرتے ہیں، واشنگٹن پوسٹ کے مطابق گزشتہ چند ماہ سے صدر پرویز مشرف نے امریکی وزیر خارجہ کونڈولیزا رائس سے کئی مرتبہ شکایت کی ہے کہ بلوں کی ادائیگی میں تاخیر ہو رہی ہے۔ پوسٹ نے سینئر حکام کے حوالے سے بتایا کہ وہ یہ نہیں چاہتے کہ ہر ماہ رسیدوں سے بھرے بکس آئیں جنہیں چیک کرنے میں کئی ماہ لگ جائیں، ان حکام کا کہنا ہے کہ اگر تھوڑی بہت زیادہ ادائیگی ہو رہی ہے تب بھی پاکستان کا تعاون ایک اچھا سودا ہے۔

__________________