دیر بالا میں قیدیوں کی گاڑی پر ریموٹ کنٹرول بم حملہ،گیارہ افرادہلاک
دیر۔۔۔۔صوبہ سرحد کے ضلع دیر بالا میں قیدیوں کو لے جانیوالی گاڑی پر بم دھماکا ،11 افراد جاں بحق اور متعدد زخمی ہو گئے، جاں بحق و زخمی ہونے والوں میں سکول کی بچیاں بھی شامل ہیں۔تفصیلات کے مطابق جمعرات کے روزدیر بالا میں قیدیوں کو لے جانیوالی گاڑی پر بم دھماکا ہوا ہے۔ جس کے نتیجہ میں گیارہ افراد جاں بحق اور متعدد زخمی ہو گئے۔پولیس کے مطابق دیر بالا میں دیر بالا چترال روڈ پر قیدیوں کی گاڑی پرریموٹ کنٹرول بم حملہ ہوا۔ جس کی ز د میں ایک سکول وین بھی آگئی ۔ دھماکے کے نتیجے میں چار طالبات، پانچ پولیس اہلکار اور تین قیدی جاں بحق اور متعدد زخمی ہوگئے۔ذرائع کا کہنا ہے کہ بم دھماکے سے بچوں کولے جانیوالی اسکول وین بھی دھماکے کا نشانہ بنی ہے ۔واقعہ کے بعد پولیس اور سیکورٹی فورسز کی بھاری نفری موقع پر پہنچ گئی اور لاشوں اور زخمیوں کو دیر بالا ہسپتال منتقل کردیا۔سول ہسپتال کے ایم ایس ڈاکٹر گل زمان کے مطابق آٹھ افراد کی لاشیں اور کئی زخمی لائے گئے جن میں ایک اور زخمی ہسپتال میں دم توڑ گیا۔ سیکورٹی فورسز ذرائع کے مطابق واقعہ کی تحقیقات کا آغاز کردیا گیا ہے۔
٭٭٭٭٭٭