درجہ بندی: (1 votes - 3.00 average)

آج 7 اکتوبر 2011ء سہ پہر دو بجے پریس کلب تیمر گرہ (ضلع دیر لوئیر( میں ایک تقریب منعقد ہوئی۔ تقریب کا انعقاد جناب حمداللہ راہیؔ صاحب کی بہترین کاوش دیوان غالب ؔ کے منظوم پشتو ترجمہ کی رونمائی کے سلسلہ میں ہوا،مہمان خصوصی پشتو کے معروف و مقبول شاعر محترم جناب اباسین یوسفزئی صاحب(چئرمین پشتو اکیڈمی)اورجناب احمد حسن خان(صوبائی اور مقامی رہنما پاکستان پیپلز پارٹی) تھے۔ تقریب میں ضلع دیر اور مضافات سے تعلق رکھنے والے شعراء،ادباء،سوشل ورکرز اور علاقہ کے معززین نے بھی شرکت کی ۔
تقریب سے خطاب کرتے ہوئے مہمان خصوصی جناب اباسین یوسفزئی صاحب نے کہا کہ کسی زبان کو دوسری زبان کا قالب پہنانا خواہ نثر میں ہی کیوں نہ ہو بڑا جان جوکھوں کا کام ہے اور خاص طور پرایک زبان کے منظوم کلام کو دوسری زبان میں نظم کی شکل میں منتقل کرنا اور زیادہ مشکل ہے،جناب حمداللہ راہیؔ صاحب نے ایک اچھی اور شاندار کوشش کی ہے اور نئی نسل خاص طور پر پشتو ادب سے شغف رکھنے والوں کے لئے ایک لائحۂ عمل مہیا کیا ہے۔جس پر وہ مبارک باد کے مستحق ہیں ۔
جناب احمد حسن خان صاحب نے کہا کہ: آج تک ہم جناب حمداللہ راہیؔ صاحب کو ایک عالمِ دین سمجھتے رہے آج یہ پتہ چلا کہ یہ اتنے بلندپایہ شاعر بھی ہیں جس پر ہمیں اور ہمارے ضلع کے عوام کو بجا طور پر فخر ہے۔
تقریب میں جناب رضون شمالؔ صاحب(سیکریٹری اطلاعات دیر ادبی کاروان ) نے ایک پُر مغز مقالہ بھی پیش کیا ۔
اختتامی کلمات مفتی عرفان الدین انورؔ(امیر جمعیۃ علماء اسلام تحصیل تیمرگرہ) نے کہے اور مفتی صاحب ہی کی دعا پر تقریب کا اختتام ہوا۔

__________________