اوکاڑہ(ثناء نیوز )وزیر اعظم سید یوسف رضا گیلانی نے کہا ہے کہ حکومت کی جانب ذوالفقار علی بھٹو کیس کا ریفرنس سپریم کورٹ بھیجنے کا مقصد صرف ایک ہے کہ اگر تاریخ میں کوئی غلطی ہوئی ہے تو اس تاریخ کو درست ہونا چاہیے۔عدلیہ سے انصاف کی توقع ہے۔ان خیالات کا اظہار وزیر اعظم نے اوکاڑہ میں کیڈٹ کالج کا افتتاح کرنے کے بعد شرکاء سے خطاب میں کیا۔وزیر اعظم نے کہا کہ ذوالفقار علی بھٹو ریفرنس بھیجنے کا مقصد تاریخ کی غلطی درست کرنا ہے۔ذوالفقار علی بھٹو ایک معصوم سیاستدان اور ملک کا اثاثہ تھے اور بھٹو جیسے لیڈر صدیوں بعد پیدا ہوتے ہیں۔بھٹو قتل کا اب فیصلہ ہونا چاہیے اور ہم سمجھتے ہیں موجودہ عدلیہ انصاف کرے گی۔وزیر اعظم نے کیڈٹ کالج کے ہوسٹل کے قیام کا اعلان کیا اور کہا کہ نئے بجٹ میں کالج کے لیے بسوں کی خریداری بھی کی جائے گی۔انہوں نے کہا کہ پی پی نے ہمیشہ پسے ہوئے طبقات کی نمائندگی ہے اور نئے وزیر قانون مولا بخش چانڈیو ایک عام پارٹی کارکن ہیں۔انہوں نے کہا کہ حکومت ذوالفقار علی بھٹو کے منشور اور ویژن کو آگے بڑھائے گی۔وزیراعظم نے کیڈٹ کالج کے افتتاح کے موقع پر علاقہ کے عوام کو مبارکباد دی کیڈٹ کالج کی تکمیل پر 99 کروڑ لاگت آئے گی اور اس میں ہر سال صوبوں سے 360 طلباء کو داخلہ دیا جائے گا۔اس موقع پر وفاقی وزیر اطلاعات و نشریات ڈاکٹر فردوس عاشق اعوان، وفاقی وزیر امور کشمیر وشمالی علاقہ جات میاں منظور ووٹو سمیت دوسرے رہنماء بھی موجود تھے۔اس سے قبل وزیر اعظم سید یوسف رضا گیلانی نے کہا ہے کہ پاکستان پیپلز پارٹی آئین کی محافظ ہے اور ہم اداروں کی مضبوطی پر یقین رکھتے ہیں۔وزیر اعظم نے کہا کہ پاکستان پیپلز پارٹی ایک نظریے اور مشن کا نام ہے جو وفاق کی علامت ہے جس کی بنیادیں چاروں صوبوں آزاد جموں و کشمیر اور گلگت و بلتستان میں ہیں۔ہمارے شہید قائدین ذوالفقار علی بھٹو اور بے نظیر بھٹو نے عوام کے حقوق کی جنگ لڑتے ہوئے اپنی جانیں قربان کیں۔وزیر اعظم نے کہا کہ پاکستان پیپلز پارٹی کی کمزور سمجھنے والے عناصر اب مایوسی کا شکار ہیں ہم نے آپس کے اختلافات بھلا کر مل کر ملک کو درپیش چیلنجز سے نمٹنا ہو گا۔انہوں نے کہا کہ حکومت کی کامیاب زرعی پالیسی کے باعث آج کسان خوشحال ہے اور ملک گندم برآمد کر رہا ہے۔انہوں نے کہا کہ عالمی کساد بازاری تیل کی قیمتوں میں اضافے دہشت گردی اور انتہاء پسندی کے خلاف جنگ کے باوجود ملک میں ترقیاتی کام جاری ہیں

__________________
لا فتی الا علیّ لا سیف الاّ ذوالفقار