اسلام آباد (صالح ظافر) لندن طیارہ سازش کیس کے مبینہ ملزم راشد رؤف کے ہفتہ کو اسلام آباد میں پولیس حراست سے ڈرامائی انداز میں فرار نے برطانوی حکومت کو دھچکے سے دوچار کردیا ہے اور اس نے حکومت پاکستان سے مطالبہ کیا ہے کہ وہ اس رپورٹ کی فوری طورپر وضاحت کرے‘ امید کی جارہی ہے کہ حکومت پاکستان (آج) پیر کو اس واقعہ کے متعلق برطانوی حکومت کو سفارتی چینل سے بریف کرے گی۔ پاکستان کی وزارت داخلہ اس واقعہ کے سلسلے میں ایک جامع رپورٹ ترتیب دے رہی ہے اور اس رپورٹ کو برطانوی حکومت کو پیش کیا جائے گا۔ حکومت پاکستان ان 7 افراد کی برطانیہ بدری پر زور دیتی رہے گی جو برطانوی سرزمین پر موجود ہیں تاہم برطانیہ ان افراد کی پاکستان حوالگی نہیں چاہتا، جس کی وجہ پاکستان اور برطانیہ کے درمیان مجرمان کی حوالگی کے معاہدے کا نہ ہونا ہے۔ ”دی نیوز“ کے اس سوال پرکہ برطانوی حکومت نے پاکستانی دفتر خارجہ سے راشد رؤف کے فرار کے حوالے سے رابطہ قائم نہیں کیا‘ دفترخارجہ کے ترجمان محمد صادق خان نے وضاحت کی کہ برطانوی حکام نے پاکستانی وزارت داخلہ سے اس معاملے میں رابطہ کیا ہے۔ دوسری جانب اسلام آباد میں برطانوی ہائی کمشنر رابرٹ برنکلے نے اتوار کو بتایا کہ پاکستان کی انتظامیہ نے راشد رؤف کے سلسلے میں ان کے مشن سے رابطہ نہیں کیا اور ہم پاکستانی حکومت سے اس معاملے میں فوری وضاحت کے طالب ہیں۔ برطانوی سفارتکار نے امید ظاہر کی کہ اس واقعہ سے دونوں ملکوں کے تعلقات پر کوئی اثر نہیں پڑے گا اور دونوں ممالک کی حکومتیں راشد رؤف کی برطانیہ حوالگی کے حوالے سے رابطے میں رہیں گی۔ علاوہ ازیں پاکستانی دفتر خارجہ کے ذرائع نے واضح کیا کہ دونوں ممالک کی حکومتیں مطلوب افراد کے ایک دوسرے سے تبادلے کیلئے کوئی مذاکرات نہیں کررہی ہیں کیونکہ مطلوب افراد کے کیسوں کی نوعیت ایک دوسرے سے مختلف ہے اور دونوں کے درمیان مطلوب افراد کی حوالگی کا کوئی معاہدہ موجود نہیں ہے۔ برطانیہ میں پاکستان کی ہائی کمشنر ملیحہ لودھی اتوار کو لندن سے اسلام آباد پہنچی ہیں اور ان کی موجودگی اس کیس کے سلسلے میں اہمیت اختیار کررہی ہے۔ امید ہے کہ وہ اعلیٰ حکام سے اس واقعہ کے حوالے سے مشاورت بھی کریں گی۔

__________________