رامسوامی میں6 منزلہ عمارت خطرنا ک قرار،فوری طور پر خالی کرنے کی ہدایت
کراچی( رپورٹ: طاہر عزیز/ تصاویر اسرائیل انصاری) صدر ٹاؤن کے علاقے رامسوامی میں واقع 6 منزلہ عمارت اجمیری مینشن کو کراچی بلڈنگ کنٹرول اتھارٹی نے خطرناک قرار دیتے ہوئے مکینوں کو فوری خالی کرنے کی ہدایت کی ہے،منگل کو کے بی سی اے کے انجینئرز کی ٹیم نے متاثرہ عمارت کا دورہ کرنے کے بعد قرار دیا ہے کہ اگر عمارت کو فوری طور پر خالی کرکے اس کی مرمت نہ کی گئی تو یہ انسانی جانوں کیلئے خطرناک اور کسی بڑے حادثے کا سبب بن سکتی ہے ، چیف کنٹرولر کے بی سی اے رؤف اختر فاروقی نے بتایا کہ اورنج اسٹریٹ اسلام پورہ میں واقع یہ عمارت گراؤنڈ+ 5 فلور پر مشتمل ہے، بلڈنگ کے اسٹرکچر کے درمیان کے تقریباً 12 کالم 2 سے 3انچ زمین میں دھنس چکے ہیں اور اس کی وجہ گر اؤنڈ فلور پر سیوریج کا پانی جمع ہونا تھا، مسلسل پانی کھڑا رہنے سے بلڈنگ کی بنیادیں کمزور ہوگئیں اور جب درمیان کے کالم زمین میں دھنسے تو سائیڈ کے کالم ٹیڑھے ہوگئے جس کے نتیجے میں اجمیری مینشن میں کریک بھی آگئے ہیں اور ساتھ میں واقع رستم کمپاؤنڈ کے مکانوں میں بھی دراڑیں پڑ گئیں اور یہ مکانات بھی بغیر مرمت رہائش کے قابل نہیں رہے ، چیف کنٹرولر نے بتایا کہ کے بی سی اے کی معائنہ ٹیم نے جو تجاویز دی ہیں اس کے مطابق بلڈنگ کو فوری طور پر خالی کر دیا جائے گراؤنڈ فلور پر اسٹیل کی پروپس لگائی جائیں اور عمارت کی مرمت کی جائے، غیر قانونی طور پر بنائے گئے چھٹے فلور کو منہدم کر دیا جائے تا کہ عمارت کا وزن کم ہو سکے جن سیوریج لائنوں سے پانی نکلا ان لائنوں کی مرمت کی جائے انہوں نے کہا کہ کے بی سی اے اجمیری مینشن میں رہائش پزیر 36 فلیٹس مالکان کو عمارت خالی کرنے کے لئے بدھ کو نوٹسز دے گی۔ انہوں نے کہا کہ اس کام کیلئے علاقے کے ٹاؤن اور یوسی ناظم سے بھی مدد لی جائے گی کیونکہ یہ مکینوں کے اپنے حق میں بہتر ہے کہ وہ عمارت کو خالی کرکے اس کی مرمت کرالیں۔ ایک سوال کے جواب میں چیف کنٹرولر نے کہا کہ کے بی سی اے عمارت کو سربمہر بھی کر سکتی ہے لیکن ہم افہام و تفہیم کے ساتھ مسئلے کو حل کرنے کی کوشش کریں گے کہ وہ اس کی مرمت کرانے کے بعد دوبارہ ان فلیٹوں میں رہائش اختیار کریں۔ انہوں نے بتایا کہ عمارت کا نقشہ کے بی سی اے سے منظور ہوا تھا۔

__________________