راولپنڈی :اوجڑی کیمپ اور پی ایچ کیو پر بم دھماکوں کے12 ملزمان گرفتار
راولپنڈی(جنگ نیوز) راولپنڈی میں اوجڑی کیمپ اور جی ایچ کیو پر بم دھماکوں کے 12ملزمان کو گرفتار کیا ہے جبکہ راولپنڈی کے علاقے ڈھوک کالا خان سے بارود سے بھری گاڑی کے ہمراہ گرفتار کئے گئے مبینہ خود کش حملہ آوروں کو ریمانڈپر ایف آئی اے کے حوالے کردیا گیا، تفصیلات کے مطابق راولپنڈی سے اوجڑی کیمپ اور جی ایچ کیو کے دھماکوں کے 12مشتبہ ملزم گرفتار کیے گئے ہیں، ذرائع کا کہنا ہے کہ ملزمان سے دھماکہ خیز مواد بھی برآمد کیا گیا۔ دوسری جانب راولپنڈی کی انسداد دہشت گردی کی عدالت نے ڈھوک کالا خان سے گرفتار ہونے والے 3مبینہ خودکش حملہ آوروں کو 10 روزہ جبکہ دو کا مزید دو روزہ جسمانی ریمانڈ منظور کر کے انہیں ایف آئی اے کے حوالے کر دیا، منگل کو ایف آئی اے کے اسسٹنٹ ڈائریکٹر نصراللہ گوندل نے ایف آئی اے پولیس اور ایلیٹ فورس کے ہمراہ بکتر بند گاڑیوں میں ملزمان راشد محمود، عبدالستار اور فرحان محمود کو انسداد دہشت گردی کی خصوصی عدالت نمبر 2 کے جج سخی محمد کہوٹ کے روبرو پیش کیا اور استدعا کی کہ ان تین ملزمان کا پندرہ روزہ جسمانی ریمانڈ منظور کیا جائے۔ فاضل جج نے ایف آئی اے کی استدعا پر ان تین ملزمان کا دس روزہ جسمانی ریمانڈ منظور کرتے ہوئے 11 جولائی کو دوبارہ پیش کرنے کا حکم دیا جبکہ انتخاب عباسی عرف عبدالمنان اور محمد شبیر سے مزید تفتیش کیلئے مزید دو روزہ جسمانی ریمانڈ منظور کر لیا ہے ۔دریں اثناء راولپنڈی پولیس نے شالے ویلی سے تین مارٹر گولے قبضے میں لے کر ناکارہ بنادیئے۔

__________________