ریاستی آپریشن کے دوران مہاجر خواتین نے جرأت کا مظاہرہ کیا، ندیم عمر
کراچی (پ ر) مہاجر قومی موومنٹ (عامر خان گروپ) کی سینٹرل ایگزیکٹو کمیٹی کے رکن ندیم عمر نے کہا ہے کہ گزشتہ چھ سالہ ریاستی آپریشن کے دوران مہاجر خواتین نے جس ہمت اور جرأت کا مظاہرہ کیا ہے وہ لائق تحسین ہے اور اب وقت آگیا ہے کہ مہاجر خواتین گھر گھر جاکر مہاجر ماؤں، بہنوں اور بزرگوں کو قوم کو درپیش مسائل ومہاجر کارکنان کیخلاف جاری حالات سے آگاہ کریں۔ ندیم عمر نے یہ بات مہاجر قومی موومنٹ شعبہ خواتین کی عہدیداران سے خطاب کرتے ہوئے کہی اس موقع پر سینٹرل ایگزیکٹو کمیٹی کے اراکین ریاض الدین اور ساجد خان بھی موجود تھے۔ ندیم عمر نے کہا کہ قومی مفاہمت کے نام پر ڈکٹیٹر کے لے پالک حکومت میں شامل ہیں اور انہیں آج بھی دہشت گردی کی کھلی اجازت ہے جس کی واضح مثال اسیر چیئرمین عامرخان کی رہائش گاہ پر دہشت گردوں کا قبضہ ہے مگر ہمارے حکمراں چودہ دن گزر جانے کے باوجود یہ قبضہ ختم نہیں کراسکے۔

__________________