28 ستمبر 2010
لاہور ( مانیٹرنگ ڈیسک ) مسلم لیگ ن کے سربراہ میاں نواز شریف نے صدر آصف علی زرداری کو تجویز پیش کی ہے کہ وہ سوئس بینک میں رکھے ہوئے پیسے قوم کے حوالے کردیں ، اب بھی وقت ہے کہ اگر وہ ان کی تجویز مان لیں اور آئندہ کرپشن نہ کرنے کا وعدہ کریں تو ممکن ہے کہ بے یقینی کی فضا ٍ ختم ہو جائے ایک انٹرویو میں میاں نواز شریف نے کہا کہ میں حقیر آدمی ہوں معاف کرنے کی بات نہیں کرسکتا البتہ ان کو شاباش دوں گا ، ہم ان کا ساتھ دیں گے لیکن اس کا یہ مطلب ہرگزنہیں کہ ہمارے لوگ وزارتوں میں بیٹھ جائیں گے البتہ یہ ضرور کہتا ہوں کہ قوم بھی زرداری کو خراج تحسین پیش کرے گی ۔پاکستان مسلم لیگ ن کے قائد نے کہا کہ ہم سیلاب زدگان کو ان کے پاﺅں پر دوبارہ کھڑا کرنے کی کوشش کر ررہے ہیں۔ انہوں نے کہا صدر زرداری کو انتخابات کے اگلے ہی دن کمیشن کے ذریعے حاصل کی گئی قومی کی امانت قوم کو واپس دینے کا اعلان کر دینا چاہئے تھا] صدر زرداری کو کہنا چاہئے تھا کہ میںنے یہ رقم کمیشن کک بیکس ٹھیکوں کے ذریعے حاصل کی تھی اور کہتے میں نئی صبح کا آغاز کرنا چاہتا ہوں لہذا قوم صدر زرداری کو معاف کر دیتی تاہم صدر نے اس وقت یہ اعلان نہیں کیا تو اب ہی یہ اعلان کردیں کیونکہ سب کو پتہ ہے کہ سوئس بینکوں میں پیسہ کس کا ہے ۔ ایک سوال کے جواب میں میاں نواز شریف نے کہا اگر عدالت کہہ رہی ہے تو سوئس حکومت کو خط لکھ دینا چاہئے۔ پاکستان مسلم لیگ (ن) کے قائد میاں نواز شریف نے اعلان کیاہے کہ وہ چودھری برادران کو پارٹی میں واپس نہیں لے سکتے کیونکہ چودھریوں کو پارٹی میں واپس لینے سے ہماری ساکھ خراب ہو گی۔ ایکسپریس نیوز سے انٹرویو میں اظہار خیال کرتے ہوئے میاں نواز شریف نے کہا کہ اگر سپریم کورٹ کے فیصلوں کو نہ مانا گیا تو خطرناک صورتحال پیدا ہو جائے گی۔ میاں نوازشریف نے اس بات پر افسوس کا اظہار کیا کہ اٹھارہویں ترمیم کے تحت تمام اختیارات حاصل کرنے کے باوجود وزیر اعظم سید یوسف رضا گیلانی نے اپنی خاموشی نہیں توڑی حالانکہ اس ترمیم کے بعد تمام تر اختیارات وزیر اعظم کے پاس آ گئے ہیں۔ وزیر اعظم کو چاہئے تھا کہ وہ صدر مملکت کے پاس جاتے اور انہیں صدر کی پالیسیاں تبدیل کرنے پر مجبور کرتے۔ ایک اور سوال کے جواب میں میاں نواز شریف نے کہا جو ہاتھ مسلم لیگ کو ایک مرتبہ پھر متحد کرنے کی کوششیں کر رہا ہے، انہیں چاہئے کہ اپنی کوششیں ترک کر دیں۔ حکومت اور اپوزیشن کو بھی چاہئے کہ وہ ایسی کوششیوں کو ناکام بنا دیں۔نواز شریف نے کہا ہے کہ نوبت یہاں تک نہیں آئے گی کہ سپریم کورٹ کو فوج طلب کرے اور نہ ہی سپریم کورٹ کو ایسا کرنا چاہئے۔ اس کے علاوہ بھی بہت سی آپشنز ہیں جن سے سپریم کورٹ اپنے فیصلے پر عملدرآمد کرا سکتی ہے۔ انہوں نے کہا کہ صدر زرداری کے سوئس مقدمات کے حوالے سے خط بھجوانے کے لئے پارلیمنٹ میں قرار داد پیش کی جا سکتی ہے۔ نواز شریف کا کہنا تھا کہ کچھ لوگ کہتے ہیں کہ مشرف کا دور بہتر تھا کوئی یہ بتائے کہ وہ کس لحاظ سے بہتر تھا ، دہشت گردی لوڈشیڈنگ اور بہت سے ایسے تحفے مشرف کی دین ہیں۔ انہوں نے کہا کہ حکومت وہ کام نہیں کر رہی جو کہ جمہوری حکومت میں کسی اچھی حکومت کو کرنا چاہئے لیکن اس کا ہر گز مطلب نہیں کہ جمہوری نظام خراب ہے، اور جمہوریت پر الزام لگانے کے بجائے ان لوگوں کو پکڑا جائے جنہوں نے اپنی ناکام گورننس اور کرپشن کی وجہ سے جمہوریت کو داغدار کیا۔نواز شریف نے کہا کہ ایسے شخص کو پارٹی میں کس طرح سے واپس لیں جس نے ایک ڈکیٹیٹر کے ساتھ مل کر جمہوریت کے خلاف سازش کی اور پارٹی توڑنے میں ڈکٹیٹر کا ساتھ دیا، ایسے لوگوں کے ساتھ اتحاد نہیں کیا جائے گا۔ انہوں نے کہا کہ وہ حکومت حاصل کرنے کے لئے اپنے اصولوں پر پانی نہیں پھیریں گے۔ چودھری صاحبان کو پارٹی میں رکھنے سے پارٹی کی ساکھ کو کافی نقصان پہنچ سکتا ہے۔

__________________
جاویداسد