پیپلز پارٹی کے شریک چئرمین آصف علی زرداری اور مسلم لیگ ن کے قائد نواز شریف کے درمیان ججوں کی بحالی کے معاملے پراختلافات کو دور کرنے کے لیے ہونے والی ملاقات کی ناکامی کے بعد دونوں لیڈر جمعہ کو دوبارہ ملیں گے۔
رائے ونڈ میں ہونے والی ملاقات کے بعد اخبار نویسوں سے بات چیت کرتے ہوئے مسلم لیگ ن کے سیکریٹری اطلاعات احسن اقبال نے کہا کہ ججوں کی بحالی کے طریقہِ کار پر فریقین کے درمیان اختلافات جوں کے توں موجود ہیں۔

احسن اقبال کے مطابق دونوں لیڈروں کے درمیان ملاقات ایک غیر رسمی ملاقات تھی جو ڈھائی گھنٹے جاری رہی۔ انہوں نے کہا کہ ملاقات میں میں اعلیٰ عدلیہ کے ججوں کی بحالی، مجوزہ آئینی پیکج، صدر کے مواخذے اور پنجاب حکومت میں اختلافی امور جیسے معاملات زیر بحث آئے۔

’ملاقات میں اس بات پر غور کیا گیا کہ ملک کو بحرانی کیفیت سے نکالنے اور قانون کی بالادستی قائم کرنے کے لیے ضروری ہے کہ دو نومبر سے پہلے کی عدلیہ کو فوری طور پر بحال کر دیا جائے۔‘

احسن اقبال کے مطابق ملاقات میں اس بات پر بھی غور کیاگیا کہ مخلوط حکومت کو برقرار رکھا جائے اور اس کے خلاف ہونے والی سازشوں کو ناکام بنایا جائے۔ ’ملاقات میں کہا گیا کہ موجودہ حکومت دونوں محاذوں پر برسرِ پیکار ہے۔‘

ملاقات میں پاکستان پیپلز پارٹی کے شریک چئرمین آصف علی زرداری کی معاونت پی پی پی کے سیکریٹری جنرل جہانگیر بدر، سینیٹر بابر اعوان، داخلہ کے مشیر رحمٰن ملک، پنجاب کے سینئر وزیر راجہ ریاض اور سابق صوبائی وزیر غلام عباس نے کی جبکہ مسلم لیگ نواز کی ٹیم میں پارٹی کے قائد نواز شریف کے علاوہ پنجاب کے وزیر اعلیٰ شہباز شریف، نواز لیگ کے چئرمین راجہ ظفرالحق، سیکریٹری جنرل سینیٹر اقبال ظفر جھگڑا، مرکزی رہنما جاوید ہاشمی، ایم این اے خواجہ آصف، مرکزی سیکریٹری اطلاعات احسن اقبال اور سردار ذوالفقار کھوسہ شامل تھے۔

__________________