نیو یارک اور لندن کے مہنگے ترین ریسٹورنٹس کو بھول جائیں؛ صرف زمبابوے ہی ایک ایسا ملک ہے جہاں ایک برگر کی قیمت لاکھوں ڈالر ہوسکتی ہے۔

زمبابوے کے مرکزی بینک نے حال ہی میں10 ملین ڈالر کا نوٹ جاری کیا ہے؛ اس اقدام کے بعد ملک میں کے بڑے نوٹ کی مالیت میں دس گنا اضافہ ہوگیا ہے۔ زمبابوے کے دارالحکومت ہرارے میں ایک معمولی برگر کی قیمت 15 ملین ڈالر ہے۔ حکومت کے مطابق نئے نوٹ کے اجراء سے لوگوں کو زیادہ تعداد میں نوٹ لے کر گھومنے سے نجات مل جائے گی اور نقد رقم کی کمی بھی پوری ہوسکے گی جبکہ اے ٹی ایم مشینیں بھی فوری طور پر 10 ملین ڈالر جاری کرسکیں گی۔

زمبابوے کی ریزرو بینک کے گورنر گیڈون گونو کا کہنا ہے کہ نئے 10 ملین ڈالر مالیت کے نوٹ 1 ملین اور پانچ ملین کے نوٹ کے ساتھ جاری کئے جائیں گے۔ اس سے قبل زمبابوے میں سب سے بڑے نوٹ کی مالیت ساڑھے سات لاکھ ڈالر تھی۔

نیا دس ملین ڈالر مالیت کا نوٹ برطانیہ کے دو پائونڈ کے برابر ہے، زمبابوے میں ایک برگر کی قیمت تین پائونڈ یعنی 15 ملین زمبابوے ڈالر کے مساوی ہے۔ افریقہ کے جنوب میں واقعہ اس ملک میں حالیہ دنوں میں ملک میں ڈبل روٹی، گوشت اور انتہائی بنیادی اشیاء کی کمی کے باعث برگر کی قیمتوں میں اضافہ ہوا ہے۔

اس وقت زمبابوے میں افراط زر کی شرح 25 ہزار فیصد ہے جو دنیا میں کسی بھی ملک سے کہیں زیادہ ہے۔ تاہم آزاد ذرائع کا کہنا ہے کہ یہ شرح 25 ہزار کی بجائے ڈیڑھ لاکھ فیصد ہے۔

ملک میں افراط زر کے بحران کا اعتراف کرتے ہوئے گیڈون گونو کا کہنا ہے کہ ملک بھر کی اے ٹی ایم مشینوں سے پیسے نکالنے کی حد 50 ملین سے بڑھا کر 500 ملین ڈالر کردی گئی ہے۔ انہوں نے کہا کہ فوجیوں، پولیس اہلکاروں اور یونیفارم والے دیگر عہدیداروں کو ادائیگی کے لیے خصوصی انتظامات کئے گئے ہیں کیونکہ ہمیں انہیں قطاروں میں کھڑا رکھنے کی خواہش نہیں۔

انہوں نے خدشہ ظاہر کیا کہ نئے نوٹ کے اجراء کے بعد مختلف اشیاء کی قیمتیں مزید بڑھنے کا امکان ہے اور اگر ایسا ہوا تو نقد رقم کی کمی کا مسئلہ حل نہیں ہوپائے گا۔ یاد رہے کہ 2006ء میں زمبابوے کی حکومت نے اپنے تمام کرنسی نوٹس میں سے تین صفر ختم کردیئے تھے۔