سابقہ فوجی مسلح افواج کا قابل فخر اور قیمتی اثاثہ ہیں،لیفٹیننٹ جنرل شفاعت شاہ
لاہور (جنگ نیوز) کور کمانڈر لیفٹیننٹ جنرل شفاعت اللہ شاہ نے کہا ہے کہ سابقہ فوجی مسلح افواج کا قابل فخر اور قیمتی اثاثہ ہیں اور قوم دفاع وطن کے لئے ان کی خدمات اور قربانیوں کی بدولت انہیں نہایت قدر کی نگاہ سے دیکھتی ہے۔ زندہ قومیں اپنے محسنوں کو کبھی فراموش نہیں کرتیں اور موجودہ قیادت ان کے جائز مسائل کے حل اور فلاح و بہبود کیلئے مسلسل کوشاں ہے ۔آرمی چیف جنرل اشفاق پرویز کیانی کی ہدایت کے مطابق موجودہ سال‘ سپاہی کا سال کے طور پر منایا جارہا ہے۔وہ اتوار کے روز لاہور کینٹ میں مسلح افواج کے ریٹائرڈ فوجیوں کی تنظیم ڈیفنس فورسز ویٹرنز ایسوسی ایشن کے سالانہ اجلاس سے خطاب کر رہے تھے۔ تقریب میں تنظیم کے سربراہ لیفٹیننٹ جنرل (ر) محمد نصیر اختر کے علاوہ حاضر سروس اور ریٹائرڈ فوجیوں کی کثیر تعداد نے شرکت کی۔ لیفٹیننٹ جنرل شفاعت اللہ شاہ نے مزید کہا کہ مسلح افواج اپنے سابقہ ملازمین کی فلاح و بہبود کیلئے اپنے تمام تر وسائل بروئے کار لانے میں کوئی کسر اٹھا نہیں رکھے گی تاہم ریٹائرمنٹ کے بعد ان کی معاشرتی ذمہ داری میں دو چند اضافہ ہو جاتا ہے۔ انہوں نے کہا کہ سابقہ فوجی معاشرے میں مسلح افواج کے سفیر کی حیثیت رکھتے ہیں۔ لہٰذا انہیں ہر موقع پر اپنی مثبت سوچ اور عمل سے یہ ثابت کرنا ہے کہ وہ جس ادارے کی نمائندگی کر رہے ہیں وہ ترقی‘ ڈسپلن‘ مثالی کردار اور روشن خیالی کا مظہر ہے۔

__________________