پاکستان کی سابق وزیراعظم بینظیر بھٹو کے مقدمۂ قتل کی تحقیقاتی ٹیم نے راولپنڈی کے سابق سٹی پولیس افسر ڈی آئی جی سعود عزیز اور ایس پی خُرم شہزاد کوگرفتار کر لیا ہے۔

سعود عزیز اور خرم شہزاد بینظیر بھٹو قتل کے مقدمے میں عبوری ضمانت پر تھے تاہم بدھ کو عدالت نے ان کی ضمانت منسوخ کر دی جس پر انہیں کمرۂ عدالت سے گرفتار کر لیا گیا۔

انسدادِ دہشتگردی کی عدالت کے جج رانا نثار نے راولپنڈی کی اڈیالہ جیل میں اس مقدمے کی سماعت کی۔

نامہ نگار شہزاد ملک کے مطابق مقدمے کی تحقیقات کرنے والی ایف آئی اے کی ٹیم نے سماعت کے دوران اس مقدمے کا ایک نیا عبوری چالان عدالت میں پیش کیا جس میں ان دونوں پولیس افسران کو کالم نمبر تین میں رکھتے ہوئے انہیں ملزم قرار دیا ہے۔

اس سے قبل چالان میں ان دونوں افسران کو کالم نمبر دو میں رکھا گیا تھا۔

عدالت نے ان افسران کی ضمانت قبل از گرفتاری منسوخ کرنے کی تین وجوہات بیان کیں جن کے مطابق اس مقدمے کی ایف آئی آر کے اندراج سے پہلے جائے حادثہ کو دھونا، بینظیر بھٹو کا پوسٹمارٹم نہ کروانا اور سابق وزیراعظم کی سکیورٹی پر مامور افسر اشفاق انور کو ڈیوٹی سے ہٹانا شامل ہیں۔

__________________
ہم ہار کے بھی جیت گئے۔ اور وہ جیت کے بھی ہار گئے۔