کراچی (اسٹاف رپورٹر ) سانحہ 18 اکتوبر کی انکوائری کرنے والے ٹریبونل کے چیئرمین ڈاکٹر غوث محمد نے منگل کو ایس ایس پی سیکورٹی امین قریشی کا بیان اسسٹنٹ ایڈووکیٹ جنرل ارشد لودھی نے قلمبند کرایا۔ منگل کواپنے بیان میں امین قریشی نے 18اکتوبر کے حوالے سے سیکورٹی پلان پیش کیا۔ دوسری جانب سندھ ہائیکورٹ نے سانحہ 18 اکتوبر پر دوسری ایف آئی آر درج کرنے کیلئے مقدمے کی سماعت 18 دسمبر تک ملتوی کردی۔ تفصیلات کے مطابق منگل کو اپنے بیان میں امین قریشی نے سیکورٹی پلان پیش کیا جو بے نظیر بھٹو کی آمد کے موقع پر تیار کیا گیا تھا۔ سیکورٹی پلان کی تیاری کے لئے سی سی پی او ، مختلف ڈی آئی جیز وغیرہ سے منظوری لی۔ سیکورٹی کے لئے منعقد مختلف اجلاسوں میں پیپلزپارٹی کے عہدیداروں اور ذمہ داروں سے ملاقاتیں کیں ان میں نثار کھوڑو، میجرل جنرل احسان، سید قائم علی شاہ ، آفتاب شعبان میرانی شامل ہیں۔ پیپلزپارٹی کے رہنماؤں کی مشاورت رہی، ان کی مرضی سے پیپلزپارٹی کے غیر مسلح رضاکار بھی رکھے گئے۔ ٹریبونل کے چیئرمین نے سماعت 11 دسمبر تک ملتوی کردی۔ ادھر سندھ ہائیکورٹ کے چیف جسٹس مسٹر جسٹس محمد افضل سومرو نے سابق وزیراعظم بے نظیر بھٹو کی سانحہ 18اکتوبر کے بارے میں دوسری ایف آئی آر درج کرانے سے متعلق درخواست کی سماعت 18دسمبر تک ملتوی کردی۔ ایڈووکیٹ جنرل سندھ مسعود نورانی نے کہا ہے کہ دوسری ایف آئی آر درج کرنے کا سیشن جج کا حکم خلاف قانون ہے، سرکار کی مدعیت میں ایف آئی آر میں تمام قانونی تقاضے پورے کئے گئے ہیں۔ بے نظیر بھٹو اور سرکاری وکیل کی باہمی رضامندی سے سماعت 18دسمبر تک ملتوی کردی۔