کراچی (اسٹاف رپورٹر) سانحہ کار ساز ٹریبونل کے سربراہ جسٹس ڈاکٹر غوث محمد کے روبرو ایس ایس پی اسپیشل برانچ شہاب مظہر بھلی نے تسلیم کیا کہ بے نظیر بھٹو کے فلوٹ کے اردگرد جو رضاکار مامور کئے گئے تھے، ان کی سیکورٹی آغا سراج درانی اور ذوالفقار مرزا کے حوالے تھی اور ہمیں ان رضاکاروں کو چیک کرنے سے منع کیا گیا چنانچہ انہیں چیک نہیں کیا گیا۔ گواہ نے کہا کہ حادثے کے وقت وہ گھر پر موجود تھا اور اپنے تمام افراد سے رابطہ میں تھا حادثے کے بعد موقع واردات پر پہنچنے کے لئے گھر سے چلا ابھی جائے واردات سے فاصلے پر تھا کہ مجھے ڈی آئی جی سیکورٹی کا فون آیا کہ آپ حادثہ کی جگہ جانے کی بجائے بلاول ہاؤس پہنچیں اور وہاں سیکیورٹی کے انتظامات چیک کریں، گواہ نے تسلیم کیا کہ سیکورٹی والوں کے پاس چیکنگ کے لئے ایسے کوئی آلات نہیں جو کسی مجمع میں شامل خودکش حملہ آور یا جیکٹ پہنے شخص کی نشاندہی کرسکے یہ صرف گیٹ سے نکلنے پر ہی پتہ چلتا ہے۔ گواہ نے کہا کہ میں صبح چار بجے تک بلاول ہاؤس رہا اس کے بعد گھر چلاگیا، ڈی ایس پی جام ظفر اللہ دھاریجو نے اپنے بیان میں کہا میں فلوٹ سے آگے بائیں جانب اپنے دیگر تین انسپکٹرز اور چھ جوانوں کے ساتھ دو جیپوں میں موجود تھا۔ ہماری ذمہ داری فلوٹ کو سیکورٹی فراہم کرنا تھی۔ گواہ کا بیان اسسٹنٹ ایڈووکیٹ جنرل ارشد لودھی قلمبند کرارہے تھے۔ گواہ نے اپنے بیان میں کہا کہ رات 12 بجکر 50 منٹ پر فلوٹ نے کارساز برج عبور کرلیا اور بائیں جانب سے اچانک زور دار دھماکہ ہوا میری گاڑی زمین سے اچھلی اور میں نے محسوس کیا کہ میرے سر سے تیزی کے ساتھ خون بہہ رہا ہے۔ دھماکہ کی وجہ سے میری گاڑی کے دونوں دروازے بند ہوچکے تھے۔ میں شیشے سے باہر نکلا میں فلوٹ کے پیچھے جانا چاہتا تھا کہ دوسرا زور دار دھماکہ ہوا اور میرے بائیں بازو سے بھی خون نکلنے لگا۔ مجھے ایمبولنس میں آغا خان اسپتال لے جایا گیا۔ پہلے دھماکے کے وقت میرے ساتھ انسپکٹر زرداری ، اسد اللہ منگی ، سب انسپکٹر محبت خان اور تین چار پولیس والے بھی زخمی ہوئے تھے جو بعد میں علاج کے لئے لیاقت نیشنل اسپتال پہنچے۔ گواہ نے کہا کہ وہ صبح چار بجے تک اسپتال میں رہا۔