پشاور۔۔۔۔۔۔۔۔سرحد کے محکمہ اوقاف اور مذہبی امور کے نگراں وزیر خالد رضا زکوڑی اپنے عہدے سے مستعفی ہوگئے ہیں۔پشاور میں خالد رضا زکوڑی نے جیونیوز کو بتایا کہ انہوں نے گورنرسرحد کو 4 جنوری کو اپنا استعفیٰ بھجوایا تھا اور گذشتہ روزگورنرسرحداور وزیر اعلیٰ کو مطلع کرنے کے لیے خط بھی بھیجاہے۔ ان کا کہنا تھا کہ گورنر کی جانب سے استعفیٰ منظور کرنے یا نہ کرنے کے حوالے سے کوئی اطلاع نہیں دی گئی ہے۔ خالد رضا زکوڑی نے بتایا کہ وہ جمعیت علمائے اسلام(ف) کے ٹکٹ پر حلقہ این اے27 لکی مروت سے انتخاب لڑرہے ہیں اور انتخابی مہم میں مصروف ہونے کے باعث خدمات انجام نہیں دے سکتے ۔ خالد رضا زکوڑی نے ایک ماہ قبل مسلم لیگ(ق) کی بنیادی رکنیت سے استعفیٰ دے کر جمعیت علمائے اسلام(ف)میں شمولیت اختیار کی تھی۔ دوسری طرف ذرائع کا کہنا ہے کہ اوقاف اور مذہبی امور کے محکمے نگراں وزیر خوراک عالم زیب کو سونپ دیئے گئے ہیں۔