تحریک انصاف کا انصاف:


اسلام آباد (عمر چیمہ) نیب زدہ لوگوں کا پارٹی میں خیر مقدم کرنے کے بعد پاکستان تحریک انصاف نے اس سردار آصف احمد کو بھی بڑی گرمجوشی سے قبول کرلیا ہے جو بطور وزیر تعلیم چیئرمین قائمہ کمیٹی برائے تعلیم عابد شیر علی اور جعلی ڈگری ہولڈرز کے درمیان رکاوٹ بن گئے تھے

جب عمران خان نے گزشتہ رات کراچی میں بڑے فخر سے کہا تھا کہ سردار آصف احمد علی کی شکل میں ایک وکٹ مل گئی ہے تو بہت سے لوگ حیران ہوئے کیونکہ تحریک انصاف میں شامل ہونے والے دیگر لوگوں سمیت نیا اضافہ (آصف احمد علی) تبدیلی تو دور کی بات یہ اسی فرسودہ نظام کی نشانی ہیں۔ ہر آنے والے دن کے ساتھ جیسے جیسے پی ٹی آئی میں ایسے لوگ آرہے ہیں جو سیٹ جیت سکتے ہیں ویسے ویسے تبدیلی کے نعرے کی سختی کے ساتھ سکروٹنی ہو رہی ہے۔

دی نیوز پہلے ہی خبر دے چکا ہے کہ نیب زدہ سابق سربراہ پولیس ملک نوید احمد پارٹی میں شامل ہو چکے ہیں۔ پختونخوا کیلئے پی ٹی آئی کی سکروٹنی کمیٹی کے سربراہ رستم شاہ مہمند نے ان کی شمولیت کی راہ ہموار رکھی کیونکہ دونوں ہم زلف ہیں، اگرچہ بطور بیورو کریٹ دونوں کی شہرت قطعی مختلف ہے۔

جہاں تک آصف احمد علی کا تعلق ہے تو وہ ناپسندیدہ وجوہات کی بنا پر ہی گیلانی کابینہ کے وزیراعظم کے وزیر کے طور پر شہ سرخیوں میں رہے اور اگر پی ٹی آئی کے منشور اور آئین کو مدنظر رکھیں تو یہ وجوہات پی ٹی آئی کیلئے سخت ناپسندیدہ ہیں۔ بطور وزیرتعلیم آصف احمد پہلی مرتبہ جسٹس عبدالحمید ڈوگر کی بیٹی فرح ڈوگر سکینڈل اور بعد ازاں ارکان پارلیمنٹ کی جعلی ڈگری کے ایشو پر اس وقت ایک ولن کے طور پر سامنے آئے، جب چیئرمین قائمہ کمیٹی برائے تعلیم اور ن لیگ کے رکن عابد شیر علی نے معاملے کو اٹھایا۔ فرح ڈوگر کیس میں جہاں ان کو میڈیکل کالج میں داخلے کیلئے غیر قانونی طور پر 20 اضافی نمبر دیئے گئے تھے جب عابد شیر علی نے معاملے کی تحقیقات کا حکم دیا تو آصف احمد علی نے تحقیقات کی سختی سے مخالفت کی۔ انہوں نے یہاں تک کہا کہ کیونکہ یہ حاضر سروس چیف جسٹس ڈوگر کی بیٹی کا معاملہ ہے اس لئے تحقیقات کو ایک طرف ان کو زیر بحث بھی نہیں لایا جا سکتا۔ انہوں نے میڈیا کو قائمہ کمیٹی کی کارروائی کی کوریج کرنے کی بھی اجازت نہیں دی تھی۔ جب عابد نے ان کو میڈیا کوریج کی اجازت دینے کے بارے میں قوانین کا حوالہ دیا تو انہوں نے ان قوانین کو قطعی طو رپر مسترد کرتے ہوئے کہا کہ ان کے حکامات سے مطابقت نہیں رکھتے۔ بالآخر معاملے کو سرد خانے کی نذر کردیا گیا کیونکہ آصف احمد علی کی مہربانی سے فرح ڈوگر نے میڈیکل کالج میں تعلیم جاری رکھی۔

آصف دوسری مرتبہ اس وقت راستے کا پتھر بنے جب میڈیا کی خبروں پر عابد شیر علی نے ارکان اسمبلی کی جعلی ڈگریوں کا معاملہ اٹھایا۔ انہوں نے ایچ ای سی چیئرمین جاوید لغاری پر دھونس جمائی، ان کو ہٹانے کیلئے دباؤ ڈالا اور پی پی حکومت نے ایچ ای سی کے سربراہ کو ڈرانے کیلئے ان کے بھائی کو گرفتار کرلیا۔ نہ صرف یہ بلکہ اس وقت کی میڈیا رپورٹس سے معلوم ہوتا ہے کہ آصف احمد علی نے پنجاب یونیورسٹی کو لکھا کہ ڈگریوں کی تصدیق کے حوالے سے ایچ ای سی کے احکامات پر عمل نہ کیا جائے۔ ایک مرتبہ پھر آصف احمد علی کی مہربانی سے جعلی ڈگری کیس دبا دیا گیا ہے، ایچ ای سی نے 1140 ارکان پارلیمان سے نصف کا ریکارڈ بھجوایا ہے جن میں 70 کے کوائف / ڈگریاں جعلی ہیں لیکن کوئی کارروائی نہیں کی گئی۔

مزید یہ کہ نمل (نیشنل یونیورسٹی آف ماڈرن لینگوئیجز) کا کنٹرول آرمی چیف کی سربراہی میں قائم بورڈ آف گورنرز کے حوالے کرنے میں اہم کردار آصف احمد علی کا تھا۔ وزارت تعلیم کا قلمدان سنبھالنے سے قبل آصف احمد علی منصوبہ بندی کمیشن کے ڈپٹی چیئرمین تھے۔ وہاں بھی انہوں نے زیادہ تر عرصہ کچھ کئے بغیر گزارا۔ آصف نے بطور ڈپٹی چیئرمین وفاقی وزیر کا درجہ حاصل کرنے کی کوشش کی کیوونکہ مخدوم شہاب الدین اس وقت وفاقی وزیر برائے منصوبہ بندی اور ترقی تھے اور بالآخر ان کو و فاقی وزیر کا درجہ دیا گیا۔ بعد ازاں انہوں نے وقت گزاری سے کام لیا اور اس بات کو یقینی بنایا کہ مخدوم شہاب کو اجلاسوں میں شرکت کیلئے مدعو نہ کیا جائے تاکہ وہ آزادانہ کام کر سکیں اور وہ اپنی اس کوشش میں کامیاب رہے لیکن جہاں تک ڈپٹی چیئرمین کی حیثیت سے ان کی کارکردگی کی بات ہے تو ان کا کام سما جی شعبے میں ترقیاتی پروگرام کی اصلاح تھا جس میں وہ ناکام رہے اور بعد ازاں ان کو وزارت تعلیم دیدی گئی۔