سرکاری اسکولوں کاتعلیمی معیار اب گرتا جا رہا ہے، وزیر تعلیم



کراچی(اسٹاف رپورٹر) قیام پاکستان کے وقت سندھ کے اسکولوں کا تعلیمی معیار بہت اچھا تھا گورنمنٹ اسکولوں میں عمدہ تعلیم دی جاتی تھی اس وقت کے لوگ اپنے کام کے لحاظ سے بہت بہترین تھے درحقیقت وہی لوگ آج ملک کی باگ ڈور سنبھالے ہوئے ہیں ان لوگوں نے گورنمنٹ اسکولوں میں ہی تعلیم حاصل کی ہے لیکن افسوس کے ساتھ کہنا پڑتا ہے کہ ہمارا تعلیمی معیار مسلسل گرتا جارہا ہے ۔ یہ بات صوبائی وزیر تعلیم شجاعت علی بیگ نے اپنے اعزاز میں دیے گئے ایک استقبالیے سے خطاب کرتے ہوئے کہی۔ انہوں نے کہا کہ محکمہ تعلیم سندھ کا سب سے بڑا محکمہ ہے جہاں 3لاکھ افراد کام کرتے ہیں۔ سندھ میں60 ہزار سے زیادہ تعلیمی ادارے قائم ہیں جن میں اسکول ، کالجز،انجینئرنگ یونیورسٹیاں، پولی ٹیکنک انسٹیٹیوٹ اور خصوصی تعلیم کے ادارے شامل ہیں آپ محکمے کے بجٹ کا تصور کرسکتے ہیں۔ ایک طالب علم پر12 سو روپے سے کم اخراجات نہیں آتے لیکن پیسہ آتا ہے اور غائب ہوجاتا ہے سندھ کے بہت سے گھوسٹ اسکول ہیں جنہیں گھوسٹ ٹیچرز چلارہے ہیں میں تعلیم کی وزارت کا چارج سنبھالنے کے بعد تعلیم کی بہتری کے لیے بہت کوششیں کررہا ہوں اور تمام ای ڈی اوز کو ہدایت کی ہے کہ وہ تعلیم کی بہتری کے لیے کام کریں ورنہ ہم تعلیمی میدان میں بہت پیچھے رہ جائیں گے۔