جاویداسد

کراچی....سول اسپتال کراچی میں استعمال شدہ سرنجوں کو دوبارہ استعمال کیلئے بیچنے کے واقعے پروزیراعلیٰ سندھ اورصوبائی وزیر صحت نے تحقیقات کی ہدایت کردی ہے،جبکہ اس کام میں ملوث خاکروب کومعطل کردیا گیاہے۔ذرائع نے جیو نیوز کے نمائندے اختر شاہین رند کو بتایا کہ گزشتہ کچھ عرصے سے سول اسپتال کراچی کے شعبہ حادثات اور دیگر وارڈز سے استعمال شدہ سرنجوں کو دوبارہ استعمال کیلئے فروخت کی جاتی ہیں اورہر روز رات کوصفائی کرنے والا عملہ شعبہ حادثات اور دیگر وارڈز سے استعمال شدہ سرنجوں کو الگ کر کے لے جاتا ہے۔ مسلسل شکایات کے بعد جیو نیوز کی ٹیم نے شعبہ حادثات میں ایک خاکروب کو رنگے ہاتھوں سرنجیں جمع کرتے ہوئے پکڑ لیا۔ جس نے اعتراف کیا کہ وہ سرنجیں لے جا کر بیچے گا۔وزیراعلیٰ سندھ نے اس واقعہ کانوٹس لیتے ہوئے تحقیقات اور ملوث افراد کے خلاف کارروائی کاحکم دیدیا ہے۔ وزیر صحت سندھ کی ہدایت پر سیکریٹری صحت ہاشم رضا زیدی بھی سول اسپتال کے شعبہ حادثات پہنچے اور واقعے کی تفصیلات معلوم کیں۔بعد میں استعمال شدہ سرنجزاستعمال کیلئے بیچنے والے خاکروب کومعطل کردیاگیا۔محکمہ صحت سندھ کے حکام کے مطابق اس عمل میں ملوث تمام دیگرافراد کے خلاف بھی محکمہ جاتی کارروائی کی جائیگی۔ذرائع کے مطابق سول اسپتال میں سال بھرسے زائد عرصے سے طبی فضلہ سائنسی بنیادوں پر ٹھکانے نہیں لگایا جا رہاہے اوراس کی وجہ مشین میں خرابی قراردی جاتی ہے تاہم جیو نیوز پر خبر نشر ہونے کے بعداسپتال انتظامیہ نے ہنگامی بنیادوں پرمشین کی مرمت کے انتظامات کرلئے ہیں۔