سعودی عرب کے ایک جج نے غیر اخلاقی ٹی وی چینلز کے مالکان کو قابل قتل قرار دیدیا
ریاض(زیڈ ایف نیوز )سعودی عرب کے سب سے سینئر جج نے کہا ہے کہ ان سیٹیلائٹ ٹی وی چینلز کے مالکان کو قتل کرنا جائز ہے جو غیر اخلاقی پروگرام نشر کرتے ہیں۔ ایک سعودی خبر رساں ادارے کی رپورٹ کے مطابق سعودی عرب کے سینیئر جج شیخ صالح ابن ال لہیدان نے کہا کہ ان سیٹیلائٹ ٹی وی چینلز کے مالکان کو قتل کرنا جائز ہے جو غیر اخلاقی پروگرام نشر کرتے ہیں۔ چینلز سے نشر ہونے والے ’شیطانی‘ تفریح کے پروگرام بدکرداری پھیلاتے ہیں۔مشرقِ وسطیٰ میں درجنوں سیٹیلائٹ چینلز اپنے پروگرام نشر کرتے ہیں اور انہیں عرب دنیا میں ہر روز لاکھوں افراد دیکھتے ہیں۔سعودی جج نے بیان قومی ریڈیو کے ایک پروگرام میں دیا۔ انہوں نے یہ بیان اس وقت دیا جب ایک سامع نے ان سے سوال کیا کہ ماہ رمضان میں چھوٹے چھوٹے کپڑوں میں ملبوس خواتین کے ان چینلز پر آنے کے متعلق ان کی کیا رائے ہے۔ انہوں نے کہا کہ ’اس میں شک نہیں ہے کہ یہ پروگرام شیطانی ہیں، ان چینلز کو چلانے والے بھی اتنے ہی قصور وار ہیں جتنا کہ انہیں دیکھنے والے۔‘ انہوں نے کہا کہ ’اس طرح کی کرپشن پھیلانے والوں کی شیطانی کو اگر کسی اور طرح کی سزاو¿ں سے نہیں روکا جا سکتا تو انہیں قتل کرنا جائز ہے۔‘ سعودی عرب میں مذہبی رہنما تو کئی مرتبہ بھی ایسے بیانات دیتے رہتے ہیں لیکن کسی سینیئر جج کی طرف سے اس طرح قتل کی بات کرنا نہایت اہم بات ہے۔ کچھ عرصہ پہلے سعودی عرب کی مذہبی پولیس نے ریاض میں پالتو بلیوں اور کتوں کی فروخت اور جانوروں کو سیر کرانے پر پابندی کو سخت کرنے کا حکم دیا تھا۔ ایک سینیئر افسر کا کہنا تھا کہ لوگ جانوروں کو سیر کرانے کے بہانے جنسی علیحدگی کے قانون کی خلاف ورزی کرتے ہیں اور مرد جانوروں کو ٹہلانے کے بہانے عورتوں سے ملتے ہیں۔ سعودی عرب کی مذہبی پولیس نے ماضی میں مغربی موسیقی، فسٹ فوڈ اور ویلنٹائن والے دن تحائف دینے پر سختی کی تھی۔