ریاض (ایجنسیاں) امام کعبہ شیخ اسامہ خیاط نے کہا ہے کہ سعودی عرب میں مظاہروں کا اعلان شیطانی حربہ ہے مسلمان ایسا مطالبہ کرنے والوں سے خبردار رہیں۔ مسجد الحرام میں خطبے میں شیخ اسامہ خیاط نے کہا کہ شیطان گمراہ کن خواب دکھا کر مسلمانوں کو بغاوت پر اُکسانا چاہتا ہے، شیطان کی کوشش ہے کہ مسلمانوں کو تنازعات میں الجھا دے۔ امام کعبہ کا کہنا تھا کہ عوام کو احتجاج اور دھرنوں میں شرکت کی ترغیب دینے والے ٹی وی چینل اور دیگر ذرائع ابلاغ شیطان کو راستہ دے رہے ہیں۔ انہوں نے کہا کہ یہ لوگ بدی کی قوتوں کے آلہ کار بنے ہوئے ہیں اور عوام کو افراتفری کی طرف لے جاکر عوامی فلاح و بہبود کو تباہ کردینا چاہتے ہیں۔ ادھرسعودی شہزادہ الولید بن طلال نے مظاہرین کو فسادی قرار دیتے ہوئے کہا ہے کہ اپوزیشن کی طرف سے دی گئی کال پر لوگوں نے یوم غضب کی بجائے شاہ عبداللہ سے محبت کا دن بنایا۔ انہوں نے کہاکہ سعودی عرب لیبیا یا مصر نہیں سعودی حکومت کو عوام کی بھرپور حمایت حاصل ہے۔ انہوں نے کہاکہ سڑکوں پر ایک بھی شخص کو احتجاج کرتے نہیں دیکھا گیا۔ انہوں نے کہاکہ شیعہ اکثریتی علاقوں میں بھی صرف 40 سے 50 افراد سڑکوں پر نکلے جو غلط فہمی کے باعث گھروں سے باہر آئے۔ شہزادہ الولید بن طلال کا کہنا تھا کہ شاہ عبداللہ ملک کے کچھ مسائل کا حل پیش کریں گے تاہم انہوں نے اس حوالے سے سیاسی اصلاحات کا ذکر نہیں کیا۔
سعودی عرب میں مظاہرے شیطانی حربہ ہیں، مسلمان خبردار رہیں، امام کعبہ

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات